პრემიერის სპეციალური წარმომადგენელი რუსეთთან ურთიერთობაში ზურაბ აბაშიძე ე.წ საზღვართან მომხდარ მკვლელობას გამოეხმაურა. აბაშიძის თქმით ამ საკითხზე ინფორმმირებულია საერთაშორისო საზოგადოება და საქართველოს ხელისუფლება აკეთებს ყველაფერს, რომ რისკები შემცირდეს. აღნიშნული განცხადება აბაშიძემ მთავრობის კანცელარიიდან გამოსვლის დროს, ჟურნალისტებთან გააკეთა. კანცელარიასთან იმ დროისთვის საპროტესტო აქციას არასამთავრობოები და სტუდენტები მართავდნენ, რომლებიც ხურჩის ინციდენტთან დაკავშირებით ხელისუფლებისგან ადეკვატურ რეაგირებას მოითხოვდნენ.

„ჩვენი მხრიდან პირველი განცხადებები უკვე გაკეთდა საკმაოდ პრინციპული და მკაცრი. საგარეომ და ძალოვანმა სტრუქტურებმა გააკეთეს განცხადებები. ალბათ დამატებითი ინფორმაცია კიდევ შეგროვდება და შემდგომი ნაბიჯები გადაიდგმება. ამის შესახენ საერთაშორისო ორგანიზაციები და ჟენევის თანათავმჯდომარეები ინფორმირებულნი არიან. ეს ისეთი თემაა, რომელიც მარტო ჩვენი გადასაწყვეტი არაა, ჩვენ ამას ჩვენ დასავლელ პარტნიორებთან ერთად ინტენსიურ მონიტორინგს ვუწევთ“- განაცხადა აბაშიძემ.

ზურაბ აბაშიძემ არ გამორიცხა, რომ ხურჩაში საქართველოს მოქალაქის მკვლელობის საკითხზე კარასინთან შეხვედრის დროსაც ისაუბროს, კარასინი-აბაშიძის ფორმატის მორიგი შეხვედრა მისი თქმით სავარაუდოდ ივნისის მეორე ნახევარში გაიმართება:

„არასდროს არ გაგვივლია გვერდით ასეთი საკითხებისთვის, მაქსიმალურად ვცდილობთ შევამციროთ რისკები, რომ ჩვენ ქვეყანაში იყოს მშვიდობა და სტაბილურობა“- აღნიშნა აბაშიძე.

მისმა პასუხებმა საპროტესტო აქციაზე მყოფი სტუდენტები არ დააკმაყოფილა და ზურაბ აბაშიძეს მეტი კონკრეტიზაცია მოსთხოვეს, რის შემდეგაც პრემიერის სპეციალური წარმომადგენელმა კანცელარიის ტერიტორია დატოვა.