"ყველა მექანიზმს გამოვიყენებთ,რომ გამოვლინდნენ და დაისაჯონ დამნაშავეები"- ციხელაშვილი ხურჩას ფაქტზე

პოლიტიკა - 16:34, 20 May, 2016

1331

შერიგებისა და სამოქალაქო თანასწორობის საკითხებში სახელმწიფო მინისტრის პირველი მოადგილის ქეთევან ციხელაშვილის შეფასებით, მთავარი დამნაშავე ხურჩაში მომხდარ ფაქტთან დაკავშირებით საქართველოს ტერიტორიების ოკუპაცია და ის ვითარებაა, რომ ადგილზე საერთაშორისო უსაფრთხოების მექანიზმები არ მუშაობს. ციხელაშვილი საერთაშორისო თანამეგობრობა ძალისხმევის გაძლიერებისკენ მოუწოდებს:

„ჩვენ გვქონდა კომუნიკაცია საერთაშორისო პარტნიორებთან. ევროკავშირის მონიტორინგის მისიის ხელმძღვანელს პირადად მე ვესაუბრე, იმისთვის, რომ დადგენილი ყოფილიყო ზუსტი გარემოებები. ჩვენ ხელთ არსებულ ყველა მექანიზმს გამოვიყენებთ იმისთვის, რომ პირველ რიგში ამას სათანადო შეფასება მიეცეს, გამოვლინდნენ და დაისაჯონ დამნაშავეები. ჩვენ ინტერესში არ არის სიტუაციის ესკალაცია , თუმცა როგორც ჩანს ეს არის სხვა მხარის ინტერესში. ჩვენ ხვალვე გვექნება შეხვედრები, მათ შორის ჟენევის თანათავმჯდომარეებთან და რა თქმა უნდა ჟენევის რაუნდამდეც, ასეთ ცხელ რეჟიმში ყველასთან გვექნება შესაბამისი კომუნიკაცია. მთავარი დამნაშავე და მთავარი გარემოება ამ სიტუაციაში გახლავთ საქართველოს ტერიტორიების ოკუპაცია და ის ვითარება, რომ ადგილზე არ გახლავთ საერთაშორისო უსაფრთხოების მექანიზმები. საერთაშორისო თანამეგობრობამ უნდა გააგრძელოს და გააძლიეროს ძალისხმევა იმისთვის, რომ საერთაშორისო უსაფრთხოების მექანიზმები ოკუპირებულ ტერიტორიებზე იქნას დაშვებული“- განაცხადა ქეთევან ციხელაშვილმა.

შეგახსენებთ, 19 მაისს დაახლოებით 14:30 საათზე ზუგდიდის რაიონის სოფელ ხურჩაში, გამყოფი ხაზის მიმდებარედ შეიარაღებულმა პირმა, ცეცხლსასროლი იარაღით სასიკვდილოდ დაჭრა გალის რაიონის სოფელ ბარღების მკვიდრი გიგა ოთხოზორია. დაჭრილი სამედიცინო დახმარების ჯგუფმა ზუგდიდის ჰოსპიტალში გადაიყვანა, თუმცა მიყენებული მრავლობითი ჭრილობების გამო, მოგვიანებით გარდაიცვალა.