საპარლამენტო ოპოზიცია პრეზიდენტს საკონსტიტუციო სასამართლოს შესახებ კანონზე ვეტოს დადებისკენ მოუწოდებს

პოლიტიკა - 16:16, 20 May, 2016

1236

საპარლამენტო ოპოზიცია პრეზიდენტის მიერ საკონსტიტუციო სასამართლოს შესახებ კანონის ვენეციის კომისიისთვის გადაგზავნას მიესალმება, თუმცა ეჭვს გამოთქვამენ, რომ კომისიის დასკვნის გამოგზავნა 10 დღიან ვადაში მოესწროს, ამიტომ ისინი გიორგი მარგველაშვილს ვეტოს უფლების გამოყენებისკენ მოუწოდებენ:

„მნნიშვნელოვანია, რომ ეს გადაიგზავნოს ვენეციის კომისიაში და ვეტო უნდა დაედოს, აქ უბრალოდ საუბარია იმასთან დაკავშირებით, რომ ზოგი იურისტი აზრით შესაძლოა პრობლემა შეიქმნას ვეტოს ვადებთან დაკავშირებით“- განაცხადა ენმ-ს წევრმა სერგო რატიანმა.

ვეტოს გამოყენებისკენ მოუწოდებენ პრეზიდენტს „თავისუფალი დემოკრატებიც“:

„ხელისუფლების პირობა, რომ კანონპროექტს ვენეციის კომისიაში მეორე მოსმენამდე გადააგზავნიდნენ არ იქნა შესრულებული და ეს სერიოზულ ზიანს აყენებს ჩვენს იმიჯს, ასევე მინდა ხაზი გავუსვა იმასაც, რომ ახლა პრეზიდენტმაც გააგზავნა და უმრავლესობამაც და ამაშიც არის მნიშვნელოვანი გაუგებრობა. ფაქტი ფაქტად რჩება კანონპროექტი სრულყოფილად მხოლოდ მაშინ მომზადდა, როდესაც ის პრეზიდენტს ხელმოსაწერად გადაუგზავნეს და მანამდე ის არ არსებობდა. აბსოლუტურად ყველა წინაპირობა არსებობს იმისათვის, რომ პრეზიდენტმა ვეტოს უფლება გამოიყენოს“- განაცხადა „ტავისუფალი დემოკრატების“ წევრმა ირაკლი ჩიქოვანმა.

კანონპროექტის ორჯერ გაგზავნის ფაქტს გამოეხმაურნენ „რესპუბლიკელებიც“, დავით ბერძენიშვილის თქმით თუ პრეზიდენტი ვეტოს უფლებას გამოიყენებს, „რესპუბლიკური პარტია“ მის დაძლევაში მონაწილეობას არ მიიღებს

„ორი თარგმანი ექნება მიღებული ვენეციის კომისიას, ერთერთი ნამდვილად ჩააღწევდა და ვიცით ნამდვილად რომ კომისიას მიღებული აქვს ტექსტი. თუ ვეტო იქნება, „რესპუბლიკელები“ მის დაძლევაში მონაწილეობას არ მივიღებთ.“- განაცხადა დავით ბერძენიშვილმა.