საქართველოსა და შეერთებული შტატების სამხედრო თანამშრომლობა და კონფლიქტი რუსეთთან იყო ერთ-ერთი თემა, რომელზეც სენატორმა ჯონ მაკკეინმა ისაუბრა. სენატის შეიარაღებული ძალების კომიტეტის თავმჯდომარე გლობალურ საფრთხეებს, რუსეთის ქმედებებსა და საქართველოს საზღვრების გადმოწევის ფაქტებს შეეხო.

„ვლადიმერ პუტინი ნათლად ცდილობს რუსეთის სამართლიანი როლისა და რუსეთის იმპერიის აღდგენას. დაელაპარაკეთ ჩვენს მეგობრებს ბალტიისპირეთში, როგორ ზეწოლას განაგრძობენ, ნახეთ რა ხდება მოლდოვაში, ყოველ რამდენიმე კვირაში ერთხელ, რუსეთი საზღვარს წევს წინ, საქართველოს ტერიტორიაში.

ჩვენ კიდევ ერთხელ მოვახდენთ უკრაინისთვის თავდაცვითი იარაღის უზრუნველყოფის ავტორიზებას, რომლის განხორციელებაზეც ამ ადმინისტრაციამ უარი თქვა, საქართველოსთან დაკავშირებით თავდაცვის აქტით სავარაუდოდ ვერაფერს გავაკეთებთ, გარდა იმისა, რომ ბევრი ჩვენგანი დაადასტურებს, რომ საქართველომ უნდა დაინახოს გზა თუნდაც ნატო-ში გასაწევრიანებლად. ეს არ არის პოპულარული ევროპაში და ეს არ მოხდება, თუმცა, მე მაინც დავუჭერ ამას მხარს ქართველი ხალხისთვის. უახლოესი ისტორიის ტრაგედია ის არის, რომ იყო თუ არა პროვოცირებული, პუტინი შეიჭრა საქართველოში და ოკუპირებული აქვს მისი სუვერენული ტერიტორიის ნაწილი, აფხაზეთი და სამხრეთ ოსეთი, ეს სამარცხვინოა. გულახდილად რომ გიტხრათ, არ მგონია, რომ ჩვენ საკმარისს ვაკეთებთ. თუმცა, ჩვენ ვაფასებთ საქართველოს გრძელვადიან ყოფნას ავღანეთში, ისინი ძალიან კარგ საქმეს აკეთებენ და ქვეყანა გარკვეული კუთხით ჯილდოს იმსახურებს“, - განაცხადა მაკკეინმა.