ე.წ. კაბელების საქმეზე საქართველოს მთავარი პროკურორის განცხადებას „თავისუფალი დემოკრატები“ ეხმაურებიან. მათი შეფასებით, ირაკლი შოთაძე კუთხეშია მომწყვდეული და ცდილობს საერთაშორისო საზოგადოების გადარწმუნებას.

„არ არის საჭირო სამოტივაციო ნაწილის წაკითხვა და მოსმენა, რომ დავასკვნათ ერთი რამ, ეს არის დიახაც, პოლიტიკურად მოტივირებული საქმე, არის ძალიან ბევრი კითხვის ნიშანი, რომლებზეც პასუხს ვერ მივიღებთ ბატონი შოთაძისგან, ახლა ის არის კუთხეში მომწყვდეული და ფიქრობს, როგორმე გადაარწმუნოს საერთაშორისო საზოგადოება და თქვას, რომ ის არის ალალმართალი“, - განაცხადა გიორგი ცაგარეიშვილმა.

ქვეყანაში პოლიტპატიმრების არსებობაზე საუბრობს „ნაციონალური მოძრაობა“.

„გადაწყვეტილებები არის აბსოლუტურად პოლიტიკური. საქართველოს სამწუხაროდ კიდევ შეემატა 5 პოლიტპატიმარი, რომლებიც შველას ითხოვენ, რომლებიც ბიძინა ივანიშვილის რეჟიმის მსხვერპლნი არიან, წულუკიანის ხელით დაიმორჩილა, დაიქვემდებარა და პოლიტიკური ზეგავლენის ქვეშ მოაქცია. ამის შედეგია ეს გადაწყვეტილება, რომელიც დადგა თავდაცვის სამინისტროს თანამშრომლების წინააღმდეგ“, - აცხადებს პეტრე ცისკარიშვილი.

ირაკლი შოთაძე გუშინ დიპლომატიურ კორპუსს შეხვდა და მათ საქმის დეტალები გააცნო. მთავარი პროკურორი მიიჩნევს, რომ მიმდინარეობს საქმის პოლიტიზირების მცდელობა მაშინ, როცა განაჩენი „ჯერჯერობით თვალით არავის უნახავს“.

შეხვედრამდე მთავარმა პროკურატურამ საქმის მტკიცებულებების ნაწილი გაასაჯაროვა.

მთავარ პროკურორთან შეხვედრის შემდეგ ჟურნალისტებისთვის კომენტარი ჩრდილო-ატლანტიკური ალიანსის სამეკავშირეო ოფისის ხელმძღვანელმა უილიამ ლაჰიუმ გააკეთა და შეხვედრას სრულყოფილი და ამომწურავი უწოდა.

ე.წ. კაბელების საქმეზე საქართველოს მთავარი პროკურორის განცხადებას მესამე სექტორი გამოეხმაურა. მათი განმარტებით, სარეზოლუციო ნაწილიდან ჩანს, რომ განაჩენი დასაბუთებული არ იქნება. არასამთავრობოები მიიჩნევენ, რომ პროკურატურამ უტყუარი, დამადასტურებელი მტკიცებულებები ვერ წარმოადგინა.