რესპუბლიკური პარტიისა და ლიბერალ ინტერნაციონალის (LI) ერთობლივი კონფერენცია საოკუპაციო ხაზთან დაგეგმილი დისკუსიის შესახებ

პოლიტიკა - 20:24, 19 May, 2016

1114

20-21-22 მაისს თბილისი ლიბერალ ინტერნაციონალის (LI) აღმასრულებებლი კომიტეტის 196-ე სხდომას მასპინძლობს. ლიბერალური პარტიების მსოფლიო გაერთიანების მთავარი პარტნიორი საქართველოში რესპუბლიკური პარტიაა. სამ დღიანი ღონისძიებების განმავლობაში, სხვადასხვა თემატური კონფერენცია გაიმართება, რომლებსაც 100-მდე ჩამოსული და ადგილობრივი მოწვეული სტუმარი დაესწრება.

პარასკევს, 20 მაისს, 10:00 საათზე სასტუმროში „ჰოლიდეი ინნ“ დაიწყება კონფერენცია - „რწმენის თავისუფლება“. ლიბერალ ინტერნაციონალის წარმომადგენლებთან ერთად, მომხსენებლები იქნებიან ლევან ბერძენიშვილი, პარლამენტის ევროპასთან ინტერგრაციის კომიტეტის თავმჯდომარე და ეკა ჭითანავა, ტოლერანტობის და მრავალფეროვნების ინსტიტუტის დირექტორი.

ასევე პარასკევს, 20 მაისს, 16:00 საათზე სოფელ ხურვალეთში, საოკუპაციო ხაზთან მოეწყობა დისკუსია ღია ცის ქვეშ - „რუსეთის მიერ საქართველოს ტერიტორიების მცოცავი ანექსია“, რომელსაც ლიბერალ ინტერნაციონალის (LI) ჩამოსული დელეგატები, მოწვეული სტუმრები, რესპუბლიკური პარტიის თავმჯდომარე ხათუნა სამნიძე და პარლამენტის ფრაქცია „რესპუბლიკელების“ წევრი თამარ ხიდაშელი დაესწრებიან.

ხურვალეთში შეკრებილებს სიტყვით მიმართავს LI-ს პრეზიდენტი, ჯული მინოვეს-ტრიქველი, ესტონეთის საგარეო საქმეთა ყოფილი მინისტი, ქეით პენტუს-როსიმანუსი, სლოვაკეთის თავდაცვის ყოფილი მინისტრი, რომან იაკიჩი და პარლამენტის ევროპასთან ინტეგრაციის კომიტეტის თავმჯდომარე, ლევან ბერძენიშვილი.

საქართველო ყოფილ საბჭოთა ქვეყნებს შორის პირველი ქვეყანაა, სადაც ლიბერალ ინტერნაციონალის კონგრესი ჩატარდება.

საქართველოს რესპუბლიკური პარტია ლიბერალ ინტერნაციონალის (LI) სრულუფლებიანი წევრი 2014 წელს როტერდამში გამართულ მსოფლიო ფედერაციის 59-ე ყრილობაზე გახდა.