"უგულავას შეუძლია მეტი სიკეთე მოუტანოს ქვეყანას გარეთ, ვიდრე საკანში. მერაბიშვილიც ძალიან ნიჭიერია"- "ოცნების" პოლიტსაბჭოს წევრი

პოლიტიკა - 16:55, 19 May, 2016

6294

ქართული ოცნების პოლიტსაბჭოს ახლადარჩეული წევრმა დავით კოღუაშვილმა „ქართულ გაზეთთან“ ინტერვიუში წინა ხელისუფლების პატიმრობაში მყოფ ყოფილ წევრებზე ისაუბრა. მისი თქმით მას არ გონია, რომ გიგი უგულავა ციხეში დიდხანს გაჩერდეს და მიაჩნია, რომ უგულავას შეუძლია გაცილებით მეტი სიკეთე მოუტანოს ქვეყანას გარეთ, ვიდრე საკანში. კოღუაშვილი ვანო მერაბიშვილსაც გარემოების მსხვერპლად მიიჩნევს:

„გიგი უგულავას ფაქტით შეიძლება შემოვიფარგლო ამ შემთხვევაში. კითხვები გააჩინა ბრალდების იმ მხარემ, რითაც იქნა ის მსჯავრდებული. სასამართლომ მიიღო ეს გადაწყვეტილება და უხერხულია, ჩავერიო მის კომპეტენციაში. თუ ბრალდება არ არის მკაფიოდ ჩამოყალიბებული, რაზედაც მერე იქნა განაჩენი გამოტანილი და ეს კითხვებს გააჩენს, ამისთვის არსებობს ევროსასამართლო და სხვა ინსტანციები. ალბათ, ეს საქმე გადაისინჯება და დარწმუნებული ვარ, ჩვენი სასამართლო შესაბამის რეგირებას მოახდენს. მე არ მგონია,რომ უგულავამ კიდევ დიდხანს დაყოს ციხეში და ვისურვებდი, მალე დაუბრუნდეს ოჯახს. მას შეუძლია გაცილებით მეტი სიკეთე მოუტანოს ქვეყანას გარეთ, ვიდრე საკანში. მერაბიშვილიც ძალიან ნიჭიერი ადამიანია. უბრალოდ, ის გახდა იმ გარემოებების მძევალი, რაც მას დაატეხა მისმა მეუღლემ. ვგულისხმობ გირგვლიანის საქმეს. დიდი შეცდომა დაუშვა მერაბიშვილმა, როგორც მინისტრმა, რომ არ გაემიჯნა ამ თემას და არ აღასრულა ის, რაც მასზე იყო დამოკიდებული. როგორც მინიმუმ, უნდა გადამდგარიყო. დღესის თავისუფლებას შეინარჩუნებდა, დარწმუნებული ვარ. ბრალდების ეს მხარეები შეიძლება გადაისინჯოს. ვინც ყველაზე მეტად იყო დასაჭერი, მან ქევეყანა დატოვა და აღარ მინდა ამას მივუბრუნდე. მე გული მწყდება თითოეული მათგანზე, რომ თავიანთი საქმეების გამო დევნილები გახდნენ. საზოგადოების განწყობას კი არჩევნებიდან გამომდინარე ვნახავთ. მინდა იყოს არჩევნები სამართლიანი, დამოუკიდებელი და უპრეცენდენტოდ დემოკრატიული. ამას ამკვიდრებს პრემიერი და მე. ამ სამსახურში ჩავდგებით და, მგონი, მომსწრე გავხდებით ახალი საქართველოს მშენებელობის“- განაცხადა კოღუაშვილმა.