"ბატონო კოღუაშვილო!"- უმრავლესობის წევრები "ოცნების" პოლიტსაბჭოს წევრს უპირისპირდებიან

პოლიტიკა - 16:28, 19 May, 2016

3493

"ქართული ოცნების" პოლიტსაბჭოს ახლადარჩეული წევრი დავით კოღუაშვილის განცხადებას იმასთან დაკავშირებით, რომ საარჩევნო სიაში არც თოფაძის და არც მეჭიაურის ადგილი არ იქნება და გამიჯვნა და დისტანცირება თავისთავად უკვე მოხდა. საპარლამენტო უმრავლესობის წევრები გამოეხმაურნენ. თამაზ მეჭიაურის განცხადებით კოღუაშვილს თავი ლიდწერად წარმოუდგენია და სხვებს ჭკუას არიგებს:

„გუშინ რომ გამოვიდა ის კოღუაშვილი და ჭკუას რომ არიგებდა ვიღაცეებს. დადიოდა ლიდერად ვიქნებიო, ლიდერებს კი არ ირჩევენ, ლიდერები ხდებიან. ახლა ახალი პარტია ამოიღეს თაროდან - "ახალი მემარჯვენეები". ადრე ერთი გააცოცხლეს -"რესპუბლიკელები", გაუკეთა რეინკარნირება ჩვენმა პარტიამ თუ ხელმძღვანელობამ, "თავისუფალ დემოკრატებს" და სხვადასხვა პარტიებს, დღის წესრიგში ახლა ეს დადგა და ჩვენ გვმოძღვრავენ ახლა და გვასწავლიან როგორ უნდა მოვიქცეთ შიგნით პარტიაში.“ - განაცხადა თამაზ მეჭიაურმა და აღნიშნა, რომ ის თავად გარკვეულწილად ლიდერია.

გოგი თოფაძის გვარის სიფრთხილით ხსენებას ურჩევს დავით კოღუაშვილს თოფაძის თანაპარტიელი ზურაბ ტყემალაძე:

„მინდა ვურჩიო ბატონ კოღუაშვილს თოფაძის გვარის ხსენებას თავი დაანებოს , მე რჩევას ვაძლევ უმცროს მეგობარს , რა დისციპლინაზე მელაპარაკება, ილაპარაკოს თავისი პარტიის დისციპლინასთან დაკავშირებით. ბატონო კოღუაშვილო, თოფაძე არ არის თქვენი ქვეშერვდომი და არც ის პიროვნება, რომელსაც პრესის საშუალებით და ასე ხმამაღლა მოუწოდოთ“- განაცხადა ზურაბ ტყემალაძემ.

შეგახსენებთ, ქართული ოცნების პოლიტსაბჭოს ახლადარჩეულმა წევრმა დავით კოღუაშვილმა პარტიულ დისციპლინაზე ისაუბრა და აღნიშნა, რომ პრინციპულ საკითხებთან დაკავშირებით პარტიაში ერთ აზრზე ყოფნა უმნიშვნელოვანესია. მისი თქმით იმ ადამიანებისგან, ვისაც ფუნდამენტურ საკითხებზე განსხვავებული მოსაზრება ქონდათ „ქართული ოცნების“ გამიჯვნა და დისტანცირება თავისთავად უკვე მოხდა. ამის მაგალითად კი გოგი თოფაძე და თამაზ მეჭიაური დასახელდა.