„დელტა“-ს ხელმძღვანელის თანამდებობიდან გადაყენების საკითხზე კომენტარს საპარლამენტო უმრავლესობის წევრი, ირაკლი სესიაშვილი კომენტარს აკეთებს და აცხადებს, რომ თინა ხიდაშელმა სწორი გადაწყვეტილება მიიღო:

„უნდა ვიყოთ ობიექტურები, ნუ გავუსწრებთ მოვლენებს, ყველას გვჭირდება და საჭიროა, რომ ამ პროცესში მივიღოთ, სრულყოფილი ინფორმაცია, ამისათვის, ქალბატონმა მინისტრმა აიღო პასუხისმგებლობა, რომ ჩატარდება შესაბამისი მოკვლევა და მოკვლევის შედეგების მიხედვით უკვე ჩვენ შეგვიძლია ვიმსჯელოთ, ვისი ან რისი ბრალი იყო“, - განაცხადა ირაკლი სესიაშვილმა.

„თავისუფალი დემოკრატები“ კი მიიჩნევენ, რომ გამოძიება აუციელებლი იყო, რათა დადგინდეს კახეთში არსებული პრობლემის მიზეზი:

„კითხვები მდგომარეობს იმაში, რომ ჩვენ ყველას გვქონდა იმედი და საზოგადოებაშიც მაღალი ინტერესით სარგებლობდა ეს თემა და ზოგადად ის, რომ ერთხელ და სამუდამოდ მოგვარდებოდა სეტყვიანობის პრობლემა კახეთში, თუმცა, დავინახეთ, რომ ეფექტიანობა იყო ძალიან დაბალი, მაგრამ გასარკვევია, ეს დაბალი ეფექტიანობა იყო იმიტომ, რომ სისტემა არის არასწორად გათვლილი, თუ უბრალოდ სისტემა არასწორად გამოიყენა იმიტომ, რომ წინ აღდგომოდა ამ სტიქიას“, - აღნიშნავს ირაკლი ჩიქოვანი.

გენერალური ინსპექცია, რომელიც დელტა-ს საქმიანობას სწავლობს, მეოთხე დღეა სამხედრო-სამეცნიერო ცენტრში იმყოფება და სწავლობს იმ დანადგარების ტექნიკურ მდგომარეობას, რომელიც არის კახეთის რეგიონში განლაგებული.

თავდაცვის მინისტრის, თინა ხიდაშელის განცხადებით, ისიც ელოდება გამოძიების დასრულებას და ამის შემდეგ, თუ კანონდარღვევას ადგილი არ ექნება, ძოძუაშვილი შესაძლოა თანამდებობაზე აღდგეს.

დელტა-ს ყოფილი ხელმძღვანელი გამოძიების შედეგებს ელოდება. უჩა ძოძუაშვილი, მისი თანამდებობიდან გათავისუფლების მიზეზებზე განმარტებებს არ აკეთებს და მხოლოდ დელტა-სა და თავდაცვის უწყებას შორის ბოლო თვეების ურთიერთობებს იხსენებს.