"ამ სისტემით დათვლილმა პარლამენტმა შეუძლებელი იქნება უფლებამოსილება განახორციელოს"- ბუკია ე.წ გერმანულ მოდელს არ ეთანხმება

პოლიტიკა - 13:17, 19 May, 2016

1528

საარჩევნო სისტემის ე.წ გერმანულ მოდელის 2016 წლისთვის შემოღებას არ ეთანხმება საპარლამენტო უმრავლესობა. „კონსერვატორების“ წევრის გიგა ბუკიას განცხადებით პირდაპირ გადმოღებული მოდელი წინააღმდეგობაში მოდის საქართველოს კონსტიტუციასთან და ამის გამო ამ სისტემით დათვლილი პარლამენტმა შეუძლებელი იქნება თავისი უფლებამოსილება განახორციელოს

„ამ ფორმით, როგორც არის ინიცირებული ეწინააღმდეგება კონსტიტუციის არაერთ პუნქტს, ვნახოთ განხილვების დროს თუ რამე სახეცვლილება იქნება, იმიტომ რომ პირდაპირ „კოპით“ გადმოტანილი გერმანული მოდელი თუ კონსტიტუციას ეწინააღმდეგება, კონსერვატორების მხრიდან არ იქნება მხარდაჭერილი ვინაიდან ეს მთლიანობაში კონსტიტუციის ფუნდამენტალურ პრინციპებს ეწინააღმდეგება და ამავე დროს ამ სისტემით დათვლილმა პარლამენტმა შეუძლებელი იქნება თავისი უფლებამოსილება განახორციელოს“- განაცხადა გიგა ბუკიამ.

შეგახსენებთ, ინტერპარტიული ჯგუფის მიერ მომზადებული ინიციატივა პარლამენტში „რესპუბლიკელებმა“ დაარეგისტრირეს.

საარჩევნო კოდექსის გერმანულ მოდელს მხარს უჭერენ რესპუბლიკელები, თავისუფალი დემოკრატები, ეროვნული ფორუმი და ნაციონალური მოძრაობა. მათი თქმით გარემოებების გათვალისწინებით აღნიშნული მოდელი ყველაზე მისაღებია, რადგან ის საარჩევნო სისტემას აუმჯობესებს და მის მიღებას საკონსტიტუციო ცვლილებები არ სჭირდება.