საქართველოს პარლამენტის თავმჯდომარემ საკონსტიტუციო სასამართლოს შესახებ კანონში შეტანილი ცვლილებების მიღების შესახებ პირველი კომენტარი გააკეთა. დავით უსუფაშვილის თქმით, რესპუბლიკური პარტია პრეზიდენტის ვეტოს დაძლევას მხარს არ დაუჭერს.

„პროექტი გადის დამუშავების სტადიას პარლამენტში, რაც კანონით არის გათვალისწინებული და უახლოეს პერიოდში პრეზიდენტს გადაეგზავნება. შემდგომ მისი მომავალი და ბედი დამოკიდებულია იმ გადაწყვეტილებებზე რასაც პრეზიდენტი მიიღებს და რასაც მიიღებს პარლამენტი. პროექტი იგზავნება ვენეციის კომისიაში. კანონით და კონსტიტუციით დადგენილ ვადებში ყველა კანონი ყოველთვის ეგზავნება პრეზიდენტს, ასე მოხდება ახლაც, რაც შეეხება იმას, რომ პრეზიდენტმა ბრძანა მე ხომ არ ჩავიდე ქუთაისშიო, თუ დადგენილ ვადაზე უფრო ადრე სჭირდება მას რაიმე, რა თქმა უნდა ქუთაისში არა, თბილისში მობრძანდეს. კანონში შესატან ცვლილებებს „რესპუბლიკურმა პარტიამ“ და მისმა წევრებმა ხმა არ მივეცით, ეს ნიშნავს იმას, რომ პროექტს არსებული სახით ჩვენ მხარს არ ვუჭერთ, ბუნებრივია თუ ის პარლამენტში კენჭისყრაზე ხელახლა დადგება ჩვენ მას მხარს არ და ვერ დავუჭერთ“, - განაცხადა დავით უსუფაშვილმა.