ე.წ "გერმანული მოდელის" განხილვა იწყება- ინტერპარტიული ჯგუფი საკომიტეტო მოსმენებისთვის ემზადება

პოლიტიკა - 10:24, 19 May, 2016

817

პარლამენტი საარჩევნო სისტემის ე.წ გერმანულ მოდელის განხილვას საკომიტეტო სხდომებზე იწყებს, მანამდე კი ამ მოდელის ინიციატორი ინტერპარტიული ჯგუფი შეხვედრას გამართავს და ამ თემაზე იმსჯელებს. სხდომაზე საუბარი შეეხება იურისტების ჯგუფის სარჩელს არსებული საარჩევნო სისტემის გაუქმებასთან დაკავშირებით, მათ მოქმედი საარჩევნო სისტემის არაკონსტიტუციურად ცნობასთან დაკავშირებით საკონსტიტუციო სასამართლოს უკვე მიმართეს.

„უკვე ინიცირებულია პარლამენტში საარჩევნო სისტემის ე.წ გერმანული მოდელი. ამ თვალსაზრისით გვექნება იმფორმაციის გაცვლა და მზადება პარლამენტში საკომიტეტო მოსმენისათვის. ასევე საუბარი იქნება იურისტთა ჯგუფის, კერძოდ ვახუშტი მენაბდის მიერ შეტანილ საკონსტიტუციო სარჩელზე, მოქმედი საარჩევნო სისტემის არაკონსტიტუციურობასთან დაკავშირებით“- განაცხადა „ახალი მემარჯვენეების“ ლიდერმა მამუკა კაციტაძემ.

ეროვნული-დემოკრატიული პარტიის თავმჯდომარის ბაჩუკი ქარდავას განცხადებით საარჩევნო სისტემის ე.წ გერმანული მოდელის ამოქმედება არის ძალიან მარტივი მოსწრებადობის თვალსაზრისითაც და პოლიტიკურადაც, რადგან ცვლილება ხორციელდება მხოლოდ დათვლის წესში:

„გერმანული მოდელი არის ძალიან მარტივი აქ არის ერთი ყველაზე მნიშვნელოვანი საკითხი, ცვლილება ხორციელდება მხოლოდ დათვლის წესში. ამ მოდელის ამოქმედება არის ძალიან მარტივი მოსწრებადობის თვალსაზრისითაც და პოლიტიკურადაც, თუ პოლიტიკური ნება იარსებებს. მთავარი მოხდეს სრული მობილიზაცია იმ პოლიტიკური სუბიექტებისა, რომლებმაც მზაობა გამოთქვეს ამ მოდელის მხარდასაჭერად.“- განაცხადა ბაჩუკი ქარდავამ.

შეგახსენებთ, ინტერპარტიული ჯგუფის მიერ მომზადებული ინიციატივა პარლამენტში „რესპუბლიკელებმა“ დაარეგისტრირეს.

საარჩევნო კოდექსის გერმანულ მოდელს მხარს უჭერენ რესპუბლიკელები, თავისუფალი დემოკრატები, ეროვნული ფორუმი და ნაციონალური მოძრაობა. მათი თქმით გარემოებების გათვალისწინებით აღნიშნული მოდელი ყველაზე მისაღებია, რადგან ის საარჩევნო სისტემას აუმჯობესებს და მის მიღებას საკონსტიტუციო ცვლილებები არ სჭირდება.