"არ გვინდა მაპის გაფეტიშება... "- რა მოლოდინები აქვს აპატურაის საქართველოსთან დაკავშირებით

პოლიტიკა - 20:51, 18 May, 2016

3337

გენერალური მდივნის სპეციალურ წარმომადგენელმა კავკასიასა და ცენტრალურ აზიაში ჯეიმს აპატურაიმ სახოგადოებრივი მაუწყებლის ჟურნალისტ ქეთევან ქარდავასთან ინტერვიუში იმ მიზეზებზე ისაუბრა, რის გამოც ნატოს წევრი ქვეყნები მზად არ არიან ამ ეტაპზე საქართველოს ალიანსში გასაწევრიანებლად. ერთ-ერთ მიზეზად აპატურაი საქართველოს უსაფრთხოებას ასახელებს, შესაძლო დაძაბულობას რუსეთის არაპროგნოზირებადი პოლიტიკის ფონზე. თუმცა აპატურაიმ ხაზი გაუსვა იმ ფაქტსაც, რომ ნატო ღია კარის პრინციპს ინარჩუნებს და საქართველოს პოლიტიკურ და პრაქტიკულ მხარდაჭერას განაგრძობს:

„ალაინსის წევრობა პოლიტიკური გადაწყვეტილებაა და არ არის მხოლოს შეიარაღებული ძალების მზადყოფნაზე და რეფორმაზე დამოკიდებული. საქართველოს აქვს ყველა პრაქტიკული მექანიზმი წევრობისთვის მოსამზადებლად. წლიური ეროვნული პროგრამა იგივეა თითქმის რაც მაპი. ადრეც მისაუბრია, რომ გასათვალისწინებელია, რა რეგიონალური გართულებები შეიძლება იყოს იმ შემთხვევაში თუ საქართველო მაპს მიიღებს და ნატოს არ ეცოდინება, თუ როდის შეძლებს მაპის შემდეგ საქართველო წევრობას.“- განაცხადა ჯეიმს აპატურაიმ.

აპატურაიმ დადებითად შეაფასა საქართველოს ხელისუფლების მიდგომა იმ საკითხთან დაკავშირებით, რომ ფოკუსირება უნდა მოხდეს მომავალ წევრობაზე და არა მაპის თემაზე:

„ვფიქრობ, გადაწყვეტილება, რომ ფოკუსირება მოხდეს მომავალ წევრობაზე და არა მაპის თემაზე, და როგორ შეიძლება საქართველოსთვის მაპის მინიჭება, ფურცელზე გაჩნდეს არის სწორი და მართებული მიდგომა, რომელიც საქართველოს ხელისუფლებას აქვს. არ გვინდა მაპის გაფეტიშება, არ ვაქციოთ პოლიტიკური დისკუსიის საგნად. საქართველოს მაპს სამიტზე არ მიანიჭებენ. რასაც ჩვენ აქ და საქართველოს მთავრობა გააკონტროლებს არის ყველაფერი მაპის გარდა.“- აღნიშნა აპატურაიმ.

ალიანსის გენერალური მდივნის სპეციალურმა წარმომადგენელმა კომენტარი ზოგიერთი ქართველი პოლიტიკოსის ანტინატოურ განცხადებებზეც გააკეთა და აღნიშნა, რომ ალიანსის საქმე ნატოს საჭიროებაში საქართველოს მოქალქეების დარწმუნება კი არა, არამედ საქართველოს მიზნების მიღწევაში დახმარებაა. ამასთანავე აპატურაის თქმით ალიანსის დეკლარაციის შინაარსზე ზემოქმედებას საქართველოში მოახლოებული არჩევნები ვერ მოახდენს:

„ეს არ არის ნატოს საქმე, რომ დავარწმუნოთ საქართველოს მოქალაქეები, გახდნენ ნატოს წევრი. ჩვენი მიზანია, საქართველოს მიზნების მიღწევაში დავეხმაროთ. დემოკრატიულ ქვეყანაში ყველას აქვს უფლება საკუთარი მოსაზრება დააფიქსიროს. რაც შეეხება არჩევნებს, არ ვიცი რა გავლენა ექნება არჩევნებზე სამიტის კომუნიკეს. ჩვენ გავაკეთებთ მაქსიმუმს, ასევე ვფიქრობ, რომ არასწორი იქნება გადაწყვეტილება დეკლარაციის შინაარსზე მოახლოებული არჩევნებიდან გამომდინარე მივიღოთ. ეს არასწორი მიდგომა იქნება. ჩვენ გავაკეთებთ ყველაფერს რაც შესაძლებელია. ქართველებზე იქნება დამოკიდებული, როგორი აღქმა მოჰყვება ჩვენს გადაწყვეტილებას.“- განაცხადა აპატურაიმ.