2016 წლის 18 მარტს, საქართველოს საგარეო საქმეთა მინისტრის მოადგილემ დავით ჯალაღანიამ შეხვედრა გამართა გაეროს სურსათისა და სოფლის მეურნეობის ორგანიზაციის (FAO) ახლადდანიშნულ წარმომადგენელთან საქართველოში, რაიმუნდ იელესთან და მის მოადგილესთან, მამუკა მესხთან.

რაიმუნდ იელემ მინისტრის მოადგილეს საზეიმოდ გადასცა რწმუნებათა სიგელი საქართველოში გაეროს სურსათისა და სოფლის მეურნეობის ორგანიზაციის (FAO) წარმომადგენლად დანიშვნის შესახებ.

შეხვედრაზე საუბარი შეეხო საქართველოში FAO-ს პროექტების მიმდინარეობასა და საქართველოსა და FAO-ს შორის თანამშრომლობის შემდგომიგაღრმავების პერსპექტივებს. ქართულმა მხარემ ხაზი გაუსვა გაერო-ს სტრუქტურებისა და მათ შორის განსაკუთრებით FAO-ს ნაყოფიერ თანამშრომლობას საქართველოს შესაბამის უწყებებთან, ქვეყნის ეკონომიკის განვითარებაში მნიშვნელოვანი წვლილის შეტანის მიზნით.

FAO-ს წარმომადგენელმა განაცხადა, რომ გაეროს სურსათისა და სოფლის მეურნეობის ორგანიზაცია კვლავ გააგრძელებს საქართველოს მთავრობის პოლიტიკისა და პროექტების მხარდაჭერას, რომლებიც საქართველოში სოფლის მეურნეობის სექტორის განვითარებისკენ იქნება მიმართული.