რუსეთი ოკუპირებულ ცხინვალსა და ყირიმში სამხედრო სწავლებას იწყებს

პოლიტიკა - 16:59, 18 May, 2016

2619

რუსეთის სამხრეთ სამხედრო ოლქი ბატალიონების მეთაური ოფიცრებისთვის სამხედრო სწავლებას იწყებს, სამხედრო სწავლება გაიმართება ოკუპირებულ ცხინვალის რეგიონში, სტავროპოლისა და კრასნოდარის მხარეში და როსტოვისა და ვოლგოგრადის ოლქებში, ასევე ანექსირებულ ყირიმშიც.

დაგეგმილი სამხედრო სწავლების შესახებ ინფორმაციას ე,წ სამხრეთ ოსეთის საინფორმაციო სააგენტო „რეს“-ი ავრცელებს. მთლიანად სწავლებაში მონაწილეობას 600 ოფიცერი და 200 ერთეული შეიარაღება და და სამხედრო ტექნიკა მიიღებს. 58-ე არმიის სამეთაურო შემადგენლობა სამხედრო სწავლებას ცხინვალის რეგიონში გაივლის .

თეორიული და პრაქტიკული სწავლებების პერიოდში ბატალიონის მეთაურები შეიარაღებულ კონფლიქტებში ჯარის მოქმედების თანამედროვე მეთოდიკას და საბრძოლო მომზადების პროცესის ორგანიზებას გაეცნობიან. სამხედრო ოლქის პრესსამსახურის ცნობით პოლიგონებზე დემონსტრაცია გაუკეთდება მტრის მიერ მასობრივი განადგურების იარაღის გამოყენების პირობებში სამხედრო დანაყოფების მოქმედების ტაქტიკას. ჩატარდება კომპლექსური ტაქტიკური და საცეცხლე მომზადება.

„საბოლოო ეტაპზე სამხედრო დანაყოფების უმაღლესი დონეზე საბრძოლო მზადყოფნასთან დაკავშირებით საჩვენებელი სწავლება გაიმართება“- აცხადებენ რუსეთის სამხრეთ სამხედრო ოლქის პრესსამსახურში.