გამოიყენებს თუ არა საქართველოს პრეზიდენტი ვეტოს უფლებას საკონსტიტუციო სასამართლოს შესახებ კანონში პარლამენტის მიერ მიღებულ ცვლილებებზე? - აღნიშნულ კითხვაზე განმარტება საქართველოს პრეზიდენტმა, გიორგი მარგველაშვილმა ტელეკომპანია „რიონის“ პირდაპირ ეთერში გააკეთა.

მისი განცხადებით კანონპროექტი პარლამენტს მისთვის ჯერ არ გადაუგზავნია, თუმცა მას ამ კანონის მიმართ აქვს ნეგატიური დამოკიდებულება:

„როგორც კი ეს პროცესი დაიწყო, ჩემი მხრიდან და ჩემი გუნდის წევრებისგან დაისვა კითხვა იმის თაობაზე, თუ რა საჭიროებას წარმოადგენს ამ კანონის ასე ფორსირებულად გატანა? რატომ არ ხდება მისი ვენეციის კომისიისთვის გადაგზავნა? ყველა ეს საკითხი იყო მნიშვნელოვანი, რეალურად ჩვენი სახელმწიფო სისტემა, დამოკიდებულია რამდენიმე მნიშვნელოვან ინსტიტუტზე, ეს არის სასამართლო, საბანკო, აუდიტი, პარლამნეტი, მთავრობის სისტემა. ძალიან მნიშვნელოვანია, რომ ამ სტრუქტურების უფლებამოსილებები იყოს დაბალანსებული და ხელისუფლების არცერთმა შტომ არ გადაქაჩოს თავისკენ ქვეყნის სტაბილურობა. ერთ-ერთი თემა იყო ეროვნული ბანკის თემა და ასეთი თემა არის საკონსტიტუციო სასამართლოს თემა. შარშანაც ჩემთვის გაუგებარი იყო რამ განაპირობა ეროვნულ ბანკზე ასეთი ფორსირებული შეტევა, ასევე გაურკვევლია პარლამენტის ფორსირებული განხილვა საკონსტიტუციო სასამართლოს კანონპროექტის მიმართ.

ჯერჯერობით პარლამენტს კანონპროექტი ჩემთან არ გადმოუგზავნია. იმისთვის, რომ მე დღეს პირდაპირ ვთქვა ვეტო იქნება თუ არა უნდა გავეცნო კანონს, განწყობა არის უარყოფითი, პროცედურული დარღვევებიც იყო. საერთოდ ტენდენცია არ მომწონს ამ მიმართებით. ეს ტენდენცია რომ შევარყიოთ ყველა ინსტიტუტი, შედეგად ვინ გაძლიერდება ამას ვერ ვხვდები. გიფიქსირებთ ჩემს ნეგატიურ დამოკიდებულებას, როდესაც კანონი მოვა ჩვენთან და გავეცნობით, იქნება კონკრეტული ვერდიქტი“, - განაცხადა გიორგი მარგველაშილმა.