თბილისის საკრებულოში 4 საათიანი განხილვა დასრულდა. თბილისის მერმა დეპუტატებს ანგარიში წარუდგინა, რის შემდეგაც პროცესი კითხვა-პასუხის რეჟიმში გადავიდა. ბოტანიკური ბაღის გასხვისების საკითხის განხილვა პოლიტიკურ დებატებში გადავიდა.

დავით ნარმანიას დეპუტატების მხრიდან მწვავე განცხადებების მოსმენა მოუწია. დედაქალაქის მერი მწვავედ გააკრიტიკა ფრაქცია რესპუბლიკელების თავმჯდომარემ, ხათუნა სამნიძემ.

სამნიძის განცხადებით „რესპუბლიკური“ პარტია დავით ნარმანიას, როგორც მერობის კანდიდატს მხარს უჭერდა, რადგან მისი პროფესიონალიზმის სჯეროდა, თუმცა, ეს მოლოდინი არ გამართლდა. სამნიძის განცხადებით, დედაქალაქის მერმა თბილისისთვის საზიანო არაერთი გადაწყვეტილება მიიღო.

„ჩვენ ვიღებთ მდგომარეობას, როდესაც თქვენ, პირადად თქვენთვის, მარტივ გზას ირჩევთ. არ ითვალისწინებთ განსხვავებულ მოსაზრებებს, არ გსურთ მიიღოთ წინააღმდეგობა და ცდილობთ, შეფარვით გაიტანოთ თქვენთვის სასურველი გადაწყვეტილებები, თუმცა, არ ვარ დარწმუნებული, რომ ამას პირადად თქვენ უნდა გეუბნებოდეთ. მერიაში პროცესები იმდენად გაუმჭვირვალო და უკონტროლოა, ვწუხვარ, რომ თქვენთან დაპირისპირება გვიწევს. თქვენი გულშემატკივრები ვიყავით რესპუბლიკელები, როცა მერად გირჩევდით და იმედი გვქონდა თქვენი პროფესიონალიზმის, დღეს ვხვდებით, რომ პროფესიონალიზმი საკმარისი არ არის, ასეთი დიდი ტვირთის სატარებლად“, - განაცხადა ხათუნა სამნიძემ.