თბილისის საკრებულოში 4 საათიანი განხილვა დასრულდა. თბილისის მერმა დეპუტატებს ანგარიში წარუდგინა, რის შემდეგაც პროცესი კითხვა-პასუხის რეჟიმში გადავიდა. ბოტანიკური ბაღის გასხვისების საკითხის განხილვა პოლიტიკურ დებატებში გადავიდა.

დავით ნარმანიას სიტყვით გამოსვლის შემდეგ, დეპუტატებმა იგი შეაფასეს. დედაქალაქის მერმა საკრებულოს წევრებისგან მრავალი შენიშვნა მიიღო.

რის შემდეგაც, ნარმანიამ დღევანდელ განხილვას „ოპოზიციის მიერ დადგმული სპექტაკლი“ უწოდა:

„დღევანდელმა სხდომამ კიდევ ერთხელ დამარწმუნა იმაში, რომ ეს პროექტი უნდა განხორციელდეს. ამით მხოლოდ მოიგებს ქალაქი და არაფერს წააგებს. დღევანდელი შეკრებით კი დავასრულეთ ის შოუ, რომლისთვისაც დიდი ხანია, ემზადებოდნენ ჩვენი ოპონენტები, მაგრამ მოთმინება არ ეყოთ, სხდომის ბოლომდე დარჩენილიყვნენ და გაიპარნენ სხდომიდან, რადგან იცოდნენ, რომ მძიმე პასუხებს მიიღებდნენ ჩვენგან იმ კითხვებზე, რომელსაც ისინი სვამდნენ,“ - განაცხადა დავით ნარმანიამ.