,,გადაწყვეტილების მიღება მოუწევს ან ამომრჩეველს ან საპროტესტოდ განწყობილ საზოგადოებას“

,,გადაწყვეტილების მიღება მოუწევს ან ამომრჩეველს ან საპროტესტოდ განწყობილ საზოგადოებას“ - ქარდავა ე.წ. კაბელების საქმეზე

პოლიტიკა - 16:48, 16 May, 2016

1837

წინასაარჩევნოდ მიღებული უნიჭო პოლიტიკური გადაწყვეტილებები, რომელიც საფრთხეს უქმნის ქვეყანას საერთაშორისო არენაზე და ზრდის ქვეყნის შიგნით დაძაბულობას - ასე აფასებს ეროვნულ-დემოკრატიული პარტიის ლიდერი ბაჩუკი ქარდავა ე.წ. კაბელების საქმეზე სასამართლოს მიერ დღეს მიღებულ გადაწყვეტილებას.

,,ბოტანიკური ბაღის საქმე, მთაწმინდის ფერდობების საქმე, რუსთავი 2-ის საქმე, საარჩევნო სისტემის გაუარესების მიმართულებით გადადგმული ნაბიჯები და ახლა უკვე ე.წ. კაბელების საქმე - ყველა ეს საქმე და მასთან დაკავშირებული გადაწყვეტილებები, თუ საზოგადოება კარგად დააკვირდება, გაკეთდა ან კეთდება სასამართლოს ხელით.

საქმე გვაქვს, ქართული სახელმწიფო ინტერესებისთვის სერიოზული ზიანის მიყენებასთან. ქვეყანაში პოლიტიკური ოპონენტები, უკვე ყოფლი მოკავშირეებიც იდევნებიან, ქვეყანაში თავისუფალი სიტყვა და განსხვავებული აზრის მატარებელი მედიასაშაულებები იდევნება - ეს ეხება რუსთავი 2-ს, მაესტროს, გავიხსენოთ დახურული მაღალრეიტინგული თოქშოუები. ძალიან ბევრი საქმე დაგროვდა წინასაარჩევნოდ ისეთი, რომელიც ერთის მხრივ, სრულად ანადგურებს სასამართლოს სისტემას და ზღუდავს სიტყვის თავისუფლებას, და ეს ხდება ვიზალიბერალიზაციის წინაპერიოდში და ვარშავის სამიტამდე. მეორეს მხრივ, როცა ქვეყანა საარჩევნო კამპანიის რეჟიმში იმყოფება და საზოგადოების ყურადღება განსაკუთრებით გამძაფრებულია თითოეული მოვლენის მიმართ, იმ ტიპის გადაწყვეტილებები ხელისუფლების და არა სასამართლოს მხრიდან, რაც დღეს ე.წ. კაბელების საქმესთან დკავშირიბით ვნახეთ - ეს ყველაფერი ზიანს აყენებს არა ცალკე აღებულ ბოტანიკურ ბაღს, ან თვისუფალ დემოკრატებს და ან რუსთავი 2-ს, არამედ ქართული სახელმწიფოს სტარტეგიულ კურსს. ეს არის მედლის ერთი მხარე.

მედლის მეორე მხარე კიდევ უფრო ბნელი და სახიფათოა. მე აღვნიშნე წინასაარჩევნო კამპანიის, როგორც საზოგადოების მაღალი აქტივობის პერიოდი, ამ პერიოდში მსგავსი ტიპის გადაწყვეტილებების მიღება ხელისუფლების მხრიდან, საქართველოში ჯერ არ მინახავს. ყველა ხელისუფლება, რაოდენ უარყოფითად არ უნდა ყოფილიყო იმ პერიოდში შეფასებული, წინასაარჩევნო კამპანიისას ყოველთვის უფრთხოდა ასეთი უგუნური გადაწყვეტილებების მიღებას“ - აცხადებს ედპ-ს ლიდერი.

,,ხელისუფლების უხეში შეცდომების კასკადზე გადაწყვეტილების მიღება ან ამომრჩეველს მოუწევს ან საპროტესტოდ განწყობილ საზოგადოებას. პირველ შემთხვევაში ხელისუფლება ზარალდება და ამაში განსაკუთრებულს ვერაფერს ვხედავ, ყველა თავის შეცდომებზე აგებს პასუხს, მაგრამ თუ ეს შეცდომები შეუქცევადი გახდება, ამ შემთხვევაში ქვეყნის სტრატეგიული ინტერესები დაზარალდება და ამაზე პასუხისმგებლობა კვლავ ხელისუფლებას დაეკისრება" - აცხადებს ქარდავა.