პირველი და ყველაზე გავრცელებული ვერსიაა - ისლამისტი ტერორისტები.

საყოველთაოდ ცნობილია, რომ "ალ ქაიდას" და სხვა მასთან დაკავშირებულ ისლამისტურ ტერორისტულ ორგანიზაციებს  დიდი სურვილი აქვთ შური იძიონ აშშ-ზე. მათ ეს არაერთხელ განუცხადებიათ. მიუხედავად იმისა, რომ 2001 წლის შემდეგ აშშ-ში მათ ტერაქტი არ განუხორციელებიათ, ეს არ ნიშნავს, რომ ისინი არ ამზადებდნენ მას - ამერიკულმა სპეცსამსახურებმა ამ 12 წლის მანძილზე რამოდენიმე ტერაქტის მცდელობის აღკვეთა მოახერხეს.

ვერსია მეორე - ადგილობრივი ულტრამემარჯვენეები.

არავისთვისაა საიდუმლო, რომ ადგილობრივ ულტრამემარჯვენეებს არ მოსწონთ აშშ-ს დღევანდელი ადმინისტრაციის პოლიტიკა. უახლოესი 20 წლის მანძილზე არაერთი ტერაქტი, თუ ტერაქტის მცდელობა ყოფილა "ულტრამემარჯვენეების" ორგანიზებით, რითიც ისინი "საზოგადოების ყურადღების მიქცევას" ცდილობენ. ისინი თვლიან, რომ სახელმწიფო ზედმეტად ლიბერალურად ექცევა სხვადასხვა უმცირესობებს, იქნება ეს რელიგიური, ეთნიკური თუ სხვა. მათ არ მოსწონთ საემიგრაციო პოლიტიკაც და თვლიან, რომ ამერიკა "კარგავს სახეს", რომ "ძირძველი ამერიკელები" ყველაზე მეტად არიან დაზარალებულები დღევანდელ აშშ-ში. ამ ვერიას ამყარებს ტერაქტის ადგილიც - ბოსტონი, სადაც 1773 წელს განვითარებული მოვლენების შედეგად, საფუძველი ჩაეყარა ამერკის სახელმწიფოს.

ვერსია მესამე - მარტოხელა ტერორისტი, ე.წ. "ამერიკელი ბრეივიკი".

თუ რა შეუძლია მარტოხელა ტერორისტს, რომელიც ინდივიდუალურ ტერაქტს ამზადებს, ყოველგვარი თანამზრახველების გარეშე, ნორვეგიაში მომხდარი ტრაგედიაც მეტყველებს. შესაძლოა, ბოსტონში მოქმედებდა მარტოხელა ტერორისტი, რომელმაც ყოველგვარი "მაღალი იდეალებისა" და საზოგადოებრიობის ყურადღების მიქცევის სურვილის გარეშე, პირადი მოსაზრებებით და მოტივებით განახორციელა ეს აქტი. ამაზე მეტყველებს ის ფაქტი, რომ უკანასკნელ თვეებში აშშ-ში რამოდენიმე ამგვარი ფაქტი მოხდა. გავიხსენოთ თუნდაც მწირეწლოვანი მოსწავლეების დახვრეტა.

ცხადია, ვერსიები ბევრია და ამერიკული საზოგადოება ელოდება თუ რამდენად სწრაფად გამოიძიებენ ფედერალური სამსახურები აღნიშნულ ტერაქტს.