საქართველოს პრემიერ-მინისტრი გიორგი კვირიკაშვილი უმრავლესობის დეპუტატ თამაზ მეჭიაურის შესახებ კიდევ ერთ განცხადებას აკეთებს. პრემიერმა ტელეკომპანია „იმედის“ პირდაპირ ეთერში აღნიშნა, რომ თამაზ მეჭიაური თავად მიიღებს გადაწყვეტილებას, რომლის თანახმადაც ახალ გუნდში აღარ იქნება:

„თამაზ მეჭიაურს გავუგზავნეთ ჩვენ მოსაწვევი, მე სპეციალურად გავუწიე კონტროლი, ვერ გეტყვით რატომ არ დაესწრო. ერთადერთი რაც შემიძლია ვთქვა, არის ის, რომ ჩვენ გვაქვს ძალიან აქტიური განხილვები ამ საკითხის, ეს იქნება გუნდური გადაწყვეტილებები, უახლოეს კვირებში ჩვენ წარმოგიდგენთ კიდევ ახალ წევრებს, ჩვენი გუნდის.

ეს არ არის პიროვნული საკითხი, ეს არის გუნდის კონსოლიდაციის საკითხი, არ უნდა არსებობდეს სტრატეგიულ საკითხებთან მიმართებით აზრთა სხვადასხვაობა. რამდენადაც ჩვენთვის არის ცნობილი, ბატონი თამაზი ამას არ მალავს, მას აქვს განსხვავებული მოსაზრება საქართველოს პოლიტიკურ ვექტორთან მიმართებით, ამიტომ სავარაუდოდ ის თავადაც მიიღებს გადაწყვეტილებას, რომ არ იქნება ამ მოვლენებში.

ეს არის დელიკატური საკითხი. მე არ ვარ ის ადამიანი, რომელიც ადამიანებთან მიმართებით ასე იქცევა, რომ მე მივიღებ გადაწყვეტილებას და ვიტყვი, რომ ბატონი თამაზი აღარ იქნება, არ ვიტყვი ამას. მე საკმაოდ მძიმე გადაწყვეტილებები მიმიღია, ამის უნარის ნაკლებობას არ განვიცდი, ყველა ადმიანთან უნდა მოვიქცეთ ღირსეულად, ბატონი თამაზი ურთულეს პერიოდში დგამდა თამამ ნაბიჯებს, ჩემი მხრიდან უკიდურესად არაეთიკური იქნებოდა, რომ მე მივიღო გადაწყვეტილება. ბატონ თამაზთან ერთად ჩვენ შევთანხმდებით, ვფიქრობ, რომ მისი საგარეო პოლიტიკური პრიორიტეტები მნიშვნელოვნად არის აცდენილი ჩვენი გუნდის საგარეო პოლიტიკურ პრიორიტეტებს“, - განაცხადა გიორგი კვირიკაშვილმა