საქართველოს პრემიერ-მინისტრი გიორგი კვირიკაშვილი დღეს „ქართული ოცნების“ თავმჯდომარედ დაამტკიცეს. კვირიკაშვილმა ტელეკომპანია „იმედის“ პირდაპირ ეთერში მის სამომავლო გეგმებსა და საქმიანობის გადანაწილებაზე ისაუბრა.

„მე მაქვს საკმაოდ რთული ამოცანა, რომ შევუთავსო ერთმანეთს პრემიერ-მინისტრობა და პარტიის თავმჯდომარეობა. სამუშაო დროის 80 პროცენტზე მეტი პრემიერ-მინისტრობას ეთმობა. ალბათ წინასაარჩევნო პერიოდში ეს პროპორცია შეიცვლება. უფრო მეტად გადავერთვები წინასაარჩევნო აქტივობებზე. დიმიტრი ქუმსიშვილს ბევრი საკითხი აქვს დელეგირებული. ამ კუთხით სანერვიულო არ მექნება“, - განაცხადა გიორგი კვირიკაშვილმა.

პრემიერის თქმით საარჩევნო სიაში ბევრი ახალი სახე იქნება, რომელთა შესახებაც საზოგადოება ინფორმაციას უახლოეს პერიოდში მიიღებს:

„სასიხარულოა, რომ ასეთი ადამიანები შემოგვიერთდნენ, ეს ადმაიანები განათლებითა და გამოცდილებით გამორჩეულები არიან. ძველი გუნდი ახალ გუნდთან ერთად ბევრი კარგის გაკეთებას შეძლებს. ჩვენ უნდა შევთანხმდეთ, როცა მოდის ახალი ლიდერი და ერთი ხელის მოსმით იცვლება გუნდი, ეს უნდა დასრულდეს. უნდა შევძლოთ ერთად მუშაობა, ეს ჩვეულებრივი ამბავია. ჩვენ დიდი იმედი გვაქვს, რომ 21 ადამიანზე გაცილებით მეტი გავა პარლამენტში, სიაში უფრო მეტი ახალი სახე იქნება, კიდევ უფრო მეტ ახალ წევრს გაიცნობს უახლოეს პერიოდში ჩვენი საზოგადოება. ეს საჭიროა ახალი პოლიტიკური იმიჯის დამკვიდრებისათვის“, - აღნიშნა გიორგი კვირიკაშვილმა.