„საკონსტიტუციო სასამართლოს შესახებ კანონში“ ცვლილებები პარლამენტმა მესამე მოსმენით დაამტკიცა. კანონპროექტს მხარი 81-მა დეპუტატმა დაუჭირა.

სხდომას პროტესტის ნიშნად ნაციონალური მოძრაობის წარმომადგენლები არ ესწრებოდნენ. მათი განცხადებით, ამ ცვლილებების შეტანით მმართველ გუნდს საკონსტიტუციო სასამართლოს დანგრევა სურს. „ნაციონალური მოძრაობა“ გიორგი მარგველაშვილს კანონპროექტზე ვეტოს დადებას სთხოვს.

აღნიშნულის შესახებ პრეზიდენტის ადმინისტრაციის უფროსმა, გიორგი აბაშიშვილმა განმარტებები გააკეთა:

„ის ფაქტი, რომ ასეთი მნიშვნელოვანი კანონის მიღება მოხდა ასე ფორსირებულად, თან იმ დროს, რომ მესამე მოსმენით ისე მიიღეს კანონი, აქამდე არ არის ვენეციის კომისიის დასკვნა და ჩვენ არ ვიცნობთ კომისიის მოსაზრებებს ამ კანონთან მიმართებით, უკვე გარკვეულ კითხვის ნიშნებს ბადებს და ეს ძალიან სამწუხაროა. საქართველოს პრეზიდენტისთვის ძალიან მნიშვნელოვანია, რომ საკონსტიტუციო სასამართლოს ეფექტიან ფუნქციონირებას არ შეექმნას არავითარი საფრთხე. ამასთან დაკავშირებით პრეზიდენტმა საკუთარი შეშფოთება გააცნო როგორც პრემიერ-მინისტრს, ასევე საქართველოს პარლამენტის თავმჯდომარეს. ამის შესახებ უშიშროების საბჭოს მდივანმა ისაუბრა საკომიტეტო მოსმენების დროს. ჩვენ დაველოდებით კანონის გადმოგზავნას პრეზიდენტის ადმინისტრაციაში, შემდგომ გავმართავთ კონსულტაციებს პროცესში ჩართულ ყველა დაინტერესებულ მხარესთან და ამის შემდგომ მიიღებს პრეზიდენტი შესაბამის გადაწყვეტილებას“, - განმარტა გიორგი აბაშიშვილმა.