საგარეო საქმეთა მინისტრის პირველი მოადგილე კანადის ექსპორტის განვითარების სააგენტოს ვიცე-პრეზიდენტს შეხვდა

პოლიტიკა - 13:08, 14 May, 2016

881

13 მაისს საგარეო საქმეთა მინისტრის პირველმა მოადგილემ დავით ზალკალიანმა შეხვედრა გამართა კანადის ექსპორტის განვითარების სააგენტოს (Export Development Canada) ვიცე-პრეზიდენტთან საერთაშორისო ბიზნესის განვითარების მიმართულებით ბრიუს დანლოპს.

შეხვედრისას დავით ზალკალიანმა კანადურ მხარეს მიაწოდა ინფორმაცია საქართველოში არსებული ბიზნეს შესაძლებლობების, საინვესტიციო კლიმატის, პრემიერ-მინისტრის მიერ ინიცირებული 4 პუნქტიანი რეფორმების გეგმის, საქართველოს საგარეო სავაჭრო რეჟიმების, ქვეყნის სატრანსპორტო-სატრანზიტო შესაძლებლობების, მიმდინარე მასშტაბური საინვესტიციო პროექტების და უახლოეს მომავალში საქართველოში დაგეგმილი მსხვილი საერთაშორისო ღონისძიებების შესახებ.

მხარეებმა ასევე განიხილეს კანადის ექსპორტის განვითარების სააგენტოს მუშაობის მიმართულებები და საქართველოსთან თანამშრომლობის შესაძლო გზები.

შეხვედრის დასასრულს მხარეებმა მიიღეს გადაწყვეტილება, რომ ქართული მხარე აქტიურად ითანამშრომლებს კანადის საერთაშორისო განვითარების სააგენტოსთან უახლოეს მომავალში შესაბამისი ბიზნეს დელეგაციების გაცვლის მიზნით.