ქორწინების შესახებ სარეფერენდუმო შეკითხვა ცესკომ არ დაარეგისტრირა

პოლიტიკა - 19:49, 13 May, 2016

2058

საქართველოს ცენტრალურმა საარჩევნო კომისიამ არ დაარეგისტრირა სარეფერენდუმოდ შეთავაზებული საკითხი, რომელიც კონსტიტუციაში ქორწინების სუბიექტების დაზუსტებას გულისხმობდა. ამ მოთხოვნით ცესკოს საინიციატივო ჯგუფმა მიმართა, რომლის შემადგენლობაშიც სანდრო ბრეგაძე, სოსო მანჯავიძე , ზვიად ტომარაძე და კახაბერ მიგინეიშვილი შედიოდნენ. სარეფერენდუმო კითხვა კი ასე ჟღერდა „თანახმა ხართ თუ არა, საქართველოს კონსტიტუციაში შევიდეს ცვლილება, რომ ქორწინება წარმოადგენს ოჯახის შექმნის მიზნით კავშირს მამაკაცსა და ქალს შორის?”

ცენტრალური საარჩევნო კომისიის განკარგულებაში აღნიშნულია, რომ საკითხი „ვერ იქნება რეგისტრაციაში გატარებული ცესკოს მიერ, რადგან სარეფერენდუმოდ გამოტანილი საკითხი ეხება არა მხოლოდ რეფერენდუმის გზით საინიციატივო ჯგუფის მიერ შემოთავაზებულ პრინციპზე გადაწყვეტილების მისაღებად ხალხის აზრის გაგებას, არამედ ამავდროულად, საკითხის მოცემული ფორმულირებით რეგისტრაციაში გატარების შემთხვევაში, ხალხის მიერ მიღებულ უნდა იქნას გადაწყვეტილება, რომ მიღებულ იქნას ამ პრინციპის მატარებელი ახალი კონსტიტუციური კანონიც, რაც ცალსახად ეწინააღმდეგება საქართველოს ორგანული კანონის „საქართველოს საარჩევნო კოდექსი” 172-ე მუხლის მე-2 პუნქტის „ა” ქვეპუნქტის და საქართველოს ორგანული კანონის „რეფერენდუმის შესახებ“ მე-3 მუხლის მე-2 პუნქტის „ა” ქვეპუნქტის მოთხოვნებს და, შესაბამისად, მოცემული სარეფერენდუმო საკითხის და შესაბამისი საინიციატივო ჯგუფის რეგისტრაციაში გატარებაზე უარის თქმის კანონით გათვალისწინებული პირდაპირი საფუძველია".

ცესკოში მიუთითებენ, რომ „სარეფერენდუმო კითხვაში კანონის მიღების ან გაუქმების მოთხოვნით დასმული საკითხის რეგისტრაციაში გატარებისა და რეფერენდუმის ამ შინაარსით გამართვის შემთხვევაში, დაირღვევა ქვეყნის კონსტიტუციური მართლწესრიგი და მივიღებთ ისეთ 3 გარემოებას, რომლის დროსაც კანონების მიღება-გაუქმების შესახებ გადაწყვეტილების მიმღები კონსტიტუციური ორგანო - პარლამენტი, შეიძლება ჩანაცვლდეს რეფერენდუმის გზით საკანონმდებლო ნორმატიული აქტების მიღება-გაუქმების პროცედურით, რასაც, როგორც აღვნიშნეთ, საქართველოს კანონმდებლობა არ ითვალისწინებს".