არის 2 სიტყვა, რომელიც ადასტურებს, რომ ოცნების ახდენა შესაძლებელია, ესაა „ლესტერ სითი“- კვირიკაშვილი

პოლიტიკა - 18:43, 13 May, 2016

2113

საქართველო პრემიერ-მინისტრმა ლონდონში ექსპერტებთან გამართულ შეხვედრაზე საქართველოს მომავალზე ისაუბრა . კვირიკაშვილის თქმით საქართველოს ხელისუფლება აცნობიერებს, რომ ეკონომიკური კეთილდღეობა და დემოკრატიული პროგრესი არის მთავარი არგუმენტები მათ წინააღმდეგ, ვინც საქართველოს მშვიდობიან გზას და დასავლურ ორიენტაციას ეწინააღმდეგება:

"მომავალში მე ვხედავ ერთიან და აყვავებულ საქართველოს, რომელიც ამაყობს ევროკავშირისა და ნატოს წევრობით. ვხედავ მომავალს, რომელშიც ჩვენ შევძლებთ რთული პრობლემების გადაჭრას და კარგი ურთიერთობების განმტკიცებას ყველა მეზობელთან, რუსეთის ჩათვლით. ვხედავ საქართველოს, როგორც უმნიშვნელოვანეს ცენტრს, რომელიც უზრუნველყოფს ევროპის ენერგოუსაფრთხოებას. ვხედავ აყვავებულ სავაჭრო, სატრანსპორტო და ლოგისტიკურ რეგიონულ ცენტრს.მავანთ ეს აუხდენელ ოცნებად შეიძლება მოეჩვენოს, მაგრამ ინგლისურ ენაში არის ორი სიტყვა, რომელიც ადასტურებს, რომ ოცნების ახდენა შესაძლებელია, ეს სიტყვებია „ლესტერ სითი“.მჯერა, რომ ამ ხედვის ხორცშესხმაში მე შემიძლია მქონდეს გაერთიანებული სამეფოსა და ჩვენი სხვა ევროპელი პარტნიორების მხარდაჭერის იმედი“- განაცხადა საქართველოს პრემიერ-მინისტრმა.

შეგახსენებთ, "ლესტერ სიტი" ინგლისური საფეხბურთო კლუბია, რომელიც 2015-16 წლების ინგლისის პრემიერ ლიგის ჩემპიონია. გუნდმა ინგლისის ჩემპიონის სტატუსი 132 წლიანი ისტორიის მანძილზე პირველად მოიპოვა. აღსანიშნავია ისიც, რომ სეზონის წინ ლესტერის გაჩემპიონებაზე ფსონი 5000/1-ზე იყო.