პარლამენტის ვიცე სპიკერის, მანანა კობახიძის განცხადებას იმასთან დაკავშირებით, რომ არჩევანის შემთხვევაში ის ბერძნიშვილს მეჭიაურს ამჯობინებს, თავად ლევან ბერძენიშვილი გამოეხმაურა. ლევან ბერძენიშვილის თქმით საკითხავია თავის ადგილზე არიან თუ არა დეპუტატები, მათ შორის, მანანა კობახიძე:

„ქართველ ხალხს ვკითხოთ, თავის ადგილზე არიან დეპუტატები, მათ შორის, მანანა კობახიძე ვიცე-სპიკერი უნდა ყოფილიყო თუ არა, ვინაიდან, მას არ ვუყვარვართ და მეჭიაური ურჩევნია, ამიტომ გავბედავ და ვიტყვი, რომ ის მის ადგილზე არ არის. ცუდი ქალი არ არის, თბილია, ზრდილობიანი, თავაზიანი, მაგრამ პარლამენტის ვიცე-სპიკერი რა დამსახურებისთვის უნდა იყოს. კობახიძე დაკავებული თანამდებობისთვის ერთ-ერთი შეუფერებელია. მას კვალიფიკაცია არ ჰყოფნის. ვიცე-სპიკერმა საკითხი ასე არ უნდა დასვას - მეჭიაური თუ ბერძენიშვილი. ვინაიდან დასვა, ე.ი. ჩემი ხელმძღვანელი აღარ არის და მეჭიაურის ხელმძღვანელია. უსუფაშვილი ამას არ იტყოდა, ის თავისიანებს და სხვისიანებს არ გაარჩევს. კობახიძისგან ეს მეტისმეტი იყო და ამან აჩვენა, რომ კლასი არ არის. ნაწყენი არ ვარ, თუმცა, კითხვაზე - კობახიძე თუ ვიღაცა, ადრე თუ კობახიძეს ვუპასუხებდი, ახლა დავფიქრდები და ვიტყვი, რომ ბრიჯიტ ბარდო ჯობია.“- განაცხადა ლევან ბერძენიშვილმა.

შეგახსენებთ, რესპუბლიკელებსა და თამაზ მეჭიაურის დაპირისპირების საკითხზე საუბრისას, მანანა კობახიძემ განაცხადა, რომ ლევან ბერძენიშვილსა და მეჭიაურს შორის არჩევანს თამაზ მეჭიაურზე შეაჩერებს: „თუ თქვენ კითხვას სვამთ ნატო თუ რუსეთი, მე გეტყვით, რომ ნატო, თუ კითხვას სვამთ ევროკავშირი თუ ესენგე, გეტყვით, რომ ევროკავშირი, თუ ამბობთ ბერძენიშვილი თუ მეჭიაური, მეჭიაური."- განაცხადა კობახიძემ.