საქართველოს პრეზიდენტის ადმინისტრაციის უფროსი გიორგი აბაშიშვილი „რესპუბლიკური პარტიის“ მხრიდან პრეზიდენტის მისამართით წამოსულ კრიტიკას გამოეხმაურა. აბაშიშვილის თქმით იმისდა მიუხედავად, რომ „რესპუბლიკური პარტია“ პრეზიდენტთან დაპირისპირებას უარყოფს, უახლოეს ისტორიაში მრავლად მოიპოვება ფაქტები, როდესაც „რესპუბლიკელები“ „ოცნებასთან“ ერთად გიორგი მარგველაშვილის წინააღმდეგ გამოდიოდნენ. ამის მაგალითად პრეზიდენტის ადმინისტრაციის უფროსმა პრეზიდენტის ვეტოების დაძლევაში „რესპუბლიკელების“ აქტიურობის მაგალითი მოიყვანა:

„ძალიან მიჭირს რაიმე ლოგიკური აზრის პოვნა თუ რატომ დაუპირისპირდნენ ერთმანეთს „რესპუბლიკელები“ და „ქართული ოცნება“ მაგალითად ბატონი მეჭიაური. ვუსმენდი რა გუშინ ბატონი ბერძენიშვილის კომენტარს, ყველა ლოგიკა, აზრების და სიტყვების წყობა ძალიან გავდა პრეზიდენტის მისამართით „ქართული ოცნების“, მათ შორის მეჭიაურის მიერ მანამდე გაკეთებულ განცხადებებს. ამავდროულად „რესპუბლიკელები“ საუბრობდნენ, რომ ისინი პრეზიდენტს მუდმივად მხარს უჭერდნენ, გუშინ ბერძენიშვილის განცხადებამ დაადასტურა, რომ პირიქით ისინი პირველი დღიდანვე ეწინააღმდეგებოდნენ პრეზიდენტს. თუმცა ეს არის რესპუბლიკელების სტილი, ისინი ხან უარყოფენ, ხან დაადასტურებენ, ხან არც უარყოფენ და არც დაადასტურებენ. საღი აზრის გამოტანა აქედან იყო ძალიან რთული. მაგრამ ერთი რამ უნდა გავიხსენოთ „რესპუბლიკური პარტია“ ყოველთვის დიდი მონდომებით მონაწილეობდა პრეზიდენტის მიერ ვეტოდადებულ, ანტიკონსტიტუციურ კანონებზე ვეტოს დაძლევაში. უფრო მეტი „რესპუბლიკური პარტიის“ წევრი ბატონი ებანოძე, მის უფროს მეჭიაურთან ერთად იყო პასუხისმგებელი საბანკო ზედამხედველობის კანონზე, რომელიც ემსახურებოდა ეროვნული ბანკის დანაწევრებას. ეს კანონი საბედნიეროდ შეჩერებული იქნა, ამ კანონზე ყველა ჩვენმა პარტნიორმა აღნიშნა, რომ ძალიან დიდი რისკის შემცველი იყო ქვეყნის ეკონომიკისთვის, ამაზე კი პასუხისმგებლობას ქართულ ოცნებასთან ერთად იღებს რესპუბლიკური პარტიაც.“- განაცხადა გიორგი აბაშიშვილმა.

შეგახსენებთ, პრეზიდენტმა გიორგი მარგველაშვილმა "რესპუბლიკელებისა" და "ქართული ოცნების" რამდენიმე წევრს შორის არსებული დაპირისპირების კომენტირებისას განაცხადა, რომ მისთვის ამ პოლიტიკურ ფიგურებს შორის სერიოზული განსხვავებები არ არის, რაგდან როგორც "რესპუბლიკელების" ასევე "ქართული ოცნების" წარმომადგენლები უნისონში საუბრობდნენ პრეზიდენტის ინსტიტუტის შესუსტების თაობაზე. პრეზიდენტის აღნიშნულ განცხადებას არაკორექტული უწოდა "რესპუბლიკელმა" ლევან ბერძენიშვილმა და განაცხადა, რომ "რესპუბილკური პარტია" მუდამ იცავდა პრეზიდენტის ინსტიტუტს.