აშშ-ს კონგრესში კონგრესმენმა ტედ პომ საქართველოს შესახებ ისაუბრა. იგი საკუთარ გამოსვლაში საქართველოსთვის თითქმის ყველა აქტუალურ საკითხს შეეხო. კონგრესმენმა ამერიკის შეერთებულ შტატებს მოუწოდა ხმამაღლა დააფიქსირონ ნატო-ში საქართველოს გაწევრიანებისადმი მხარდაჭერა. მან ასევე ოქტომბრის საპარლამენტო არჩევნების მნიშვნელობაზეც გაამახვილა ყურადღება:

„ბოლო 25 წლის განმავლობაში საქართველო იქცა ყველაზე თავისუფალ ქვეყანად რეგიონში და დღეს კონტრასტს ქმნის მის ჩრდილოეთით პუტინის დიქტატურასთან. მიუხედავად ამისა, რუსეთს უარი არ უთქვამს თავის ამბიციებზე საქართველოზე კონტროლის მოპოვებასთან დაკავშირებით. რუსეთს არ მოსწონს საქართველოს სწრაფვა დემოკრატიისა და თავისუფლებისკენ. საქართველომ ეფექტიანი მმართევლობა თავისი რეფორმების ქვაკუთხედად აქცია. უზრუნველყო ეკონომიკური ზრდა და მიაღწია მნიშვნელოვან წინსვლას დემოკრატიული საზოგადოების მშენებლობის გზაზე. საქართველო ასევე ლიდერობს ბიზნესისა და თავისუფალი ბაზრის კატეგორიებში. ქართველი ხალხი და მისი მთავრობა იზიარებენ ჩვენს დასავლურ ღირებულებებს.

ამერიკის შეერთებულმა შტატებმა ხმამაღლა უნდა დააფიქსიროს თავისი პოზიცია და მხარი დაუჭიროს საქართველოს, ნატო-სკენ მიმავალ გზაზე. ამერიკის შეერთებული შტატები უნდა ჩაერთოს მოლაპარაკებებში საქართველოსთან თავისუფალი ვაჭრობის შეთანხმებასთან დაკავშირებით, რათა ჩვენი ქვეყნების ეკონომიკაში გაჩნდეს ახალი სამუშაო ადგილები და გაჟღერდეს გზავნილი, რომ საქართველო არის ამერიკის შეერთებული შტატების განსაკუთრებული მეგობარი.

გარდა ამისა, საქართველო არის მნიშვნელოვანი პარტნიორი საერთაშორისო ტერორიზმთან ბრძოლაში. საქართველო ემზადება ოქტომბერში დაგეგმილი არჩევნებისთვის, რომლის თავისუფალ და სამართლიან გარემოში ჩატარების უზრუნველყოფის მიზნითაც, ქართველებმა მიიწვიეს დამოუკიდებელი საერთაშორისო დამკვირვებლები, რათა მათ განახორციელონ ოქტომბრის არჩევნების მონიტორინგი. ამერიკის შეერთებულმა შტატებმა და ჩვენმა მოკავშირეებმა ნატო-ში უნდა გამოიჩინონ სიმტკიდე და მხარი დაუჭირონ საქართველოს“,- განაცხადა კონგრესმენმა.