ხვალ, 12 მაისს პარლამენტის პლენარული სხდომა გაიმართება. გადაწყვეტილება ამის შესახებ პარლამენტის ბიურომ ხმათა უმრავლესობით მიიღო. გადაწყვეტილებას საპარლამენტო უმცირესობის წევრებმა მხარი არ დაუჭირეს.

საპარლამენტო უმრავლესობის წევრების განმარტებით, პლენარული სხდომების დღის წესრიგში მნიშვნელოვანი საკითხებია შეტანილი, რის გამოც აუცილებელია სხდომის ხვალ ჩატარება.

საპარლამენტო უმცირესობის წარმომადგენლების განცხადებით, ვინაიდან 12 მაისი უქმე დღეა, მათ წინასწარ ჰქონდათ დაგეგმილი ღონისძიებები, რომლებსაც ვერ გადადებენ. ამის გამო, უმცირესობის წევრებს მიაჩნიათ, რომ ხვალ პლენარული სხდომა არ უნდა გაიმართოს.

პარლამენტის თავმჯდომარემ, დავით უსუფაშვილმა პლენარული სხდომის დანიშვნასთან დაკავშირებით განმარტება გააკეთა. „სხდომა ამ წუთამდე დანიშნული 12 მაისს არ ყოფილა, თუმცა სხდომის შესაძლო დანიშვნის თაობაზე მინიმუმ სამი კვირაა ჩვენ ბიუროზე ვმსჯელობდით, თუმცა გადაწყვეტილება არ გვქონდა მიღებული. რეალობა ასეთია“,-განაცხადა დავით უსუფაშვილმა.

ხვალ, ბიუროს სხდომა 13:30 წუთზე, ხოლო პლენარული სხდომა 14:00 საათზე დაიწყება.