„ქართული ოცნების“ აღმასრულებელი მდივანი რამდენიმე პარტიას „ნაციონალური მოძრაობის“ სატელიტად მოიხსენიებს. ირაკლი კობახიძის განცხადებით, პოლიტიკური გაერთიანებების გარდა ყოფილი მმართველი ძალის ინტერესების გამტარებელია ასევე პაატა ბურჭულაძის „საქართველოს განვითარების ფონდიც“. მას არგუმენტად ოზურგეთში დაგეგმილი შუალედური არჩევნები მოჰყავს.

კობახიძის განცხადებას, „საქართველოს განვითარების ფონდის“ საგარეო პოლიტიკის თემატური ჯგუფის ხელმძღვანელმა, გიორგი რუხაძემ უპასუხა:

„ძალიან ინტენსიური შეხვედრები გვაქვს რეგიონებში და ეს მოთხოვნა, რომ პაატა ბურჭულაძე მოვიდეს პოლიტიკაში თავის გუნდთან ერთად არის, ამას ადასტურებს კვლევებიც, ბუნებრივია ამას საფრთხედ მიიჩნევს სავარაუდოდ „ქართული ოცნება“ და შესაბამისად ის მოქმედებს პრინციპით, „ვინც ჩვენთან არ არის, ჩვენი მტერია“, ვინ ვინ და თუ ვინმე აგრძელებს „ნაციონალური მოძრაობის“ პოლიტიკას, რომელიც იყო ცუდი პოლიტიკა და ამას თვითონ „ნაციონალური მოძრაობაც“ აღიარებს, ეს არის „ქართული ოცნება“, - განაცხადა რუხაძემ.