პრემიერი მეჭიაურს პასუხობს - ,,საკუთარი თავის დამკვიდრების მცდელობა და ქვეყნის იმიჯისთვის საზიანო“

პოლიტიკა - 17:38, 11 May, 2016

3464

უმრავლესობის ერთ-ერთი ლიდერი თამაზ მეჭიაურის განცხადებას უპასუხა პრემიერ-მინისტრმა, გიორგი კვირიკაშვილი საქართველოს ტერიტორიაზე ქართულ-ამერიკული სამხედრო სწავლების წინააღმდეგ გაკეთებულ განცხადებებს ქვეყნის იმიჯისთვსი საზიანოს უწოდებს.

აღნიშნული განცხადება გიორგი კვირიკაშვილმა ქართულ-ამერიკული სწავლების - „ღირსეული პარტნიორი 2016“-ის გახსნის ოფიციალური ცერემონიალის დროს მედიასთან გააკეთა

,,დღეს ჩვენ გვაქვს სრულიად სხვა წინასაარჩევნო გარემო და ამ გარდამავალ პერიოდში, სხვადასხვა განცხადებები, რომელიც გენერალურ და სტრატეგიულ ხაზსს არის აცლებული, ჩვეულებრივი მოვლენაა. მთავარია ის, თუ როგორი იქნება საქართველოს განვითარების ვექტორი და ამ კუთხით შეკითხვები არ არსებობს. მნიშვნელოვანია ის, რომ პოლიტიკური გუნდი, რომელიც ქვეყანას მართვას, არ არის მუდმივი ორგანიზმი, ის არის განახლებადი და ამ პროცესში ვიმყოფებით ჩვენ. ამდენად, ყველანაირი ვაი-ვიში, რომელიც ამ საკითხთან დაკავშირებით არის ატეხილი, სრულიად უადგილოა, ემსახურება მხოლოდ და მხოლოდ საკუთარი თავის პოლიტიკურად დამკვიდრების მცდელობას და აზიანებს ქვეყნის საერთაშორისო იმიჯს“ - განაცხადა გიორგი კვირიკაშვილმა.

პრემიერ-მინისტრის თქმით, საქართველოს უსაფრთხოება და საქართველოს მოქალაქეების მშვიდი ცხოვრება გადის ერთადერთ გზაზე – ეს არის თანამშრომლობა დასავლელ პარტნიორებთან.

„საქართველოს თავდაცვისუნარიანობის განმტკიცება და უსაფრთხოება საქართველოში, საქართველოს მოქალაქეების მშვიდი ცხოვრება გადის ერთადერთ გზაზე და ეს გზა არის თანამშრომლობა დასავლეთთან, ჩვენს სტრატეგიულ პარტნიორებთან და ამას ალტერნატივა არ გააჩნია.“- განაცხადა გიორგი კვირიკაშვილმა.

შეგახსენებთ, ქართულ-ამერიკული სწავლება საფრთხედ კვირიკაშვილის თანაგუნდელმა თამაზ მეჭიაურმა მოიხსენია, „ქართული ოცნების“ დეპუტატის თქმით მაშინ როდესაც რეგიონში დაძაბული ვითარებაა, საქართველოს ტერიტორიაზე სამხედრო ძალის კონცენტრაცია არ უნდა ხდებოდეს