"NATO-ს წვრთნები თავის ტკივილია რუსეთისთვის და საქართველოში მყოფი რუსეთუმეებისთვის"- კაციტაძე

პოლიტიკა - 15:48, 11 May, 2016

2139

ქართულ-ამერიკული "სწავლება ღირსეული პარტნიორი 2016"-ის ოფიციალურად დაწყებას "ახალი მემარჯვენეების" ლიდერი მამუკა კაციტაძე აფასებს.

კაციტაძისთვის მიუღებელია ამ თემაზე უმრავლესობის რიგი დეპუტატების შეფასებები, რომლის მიხედვითაც წვრთნა რუსეთს გააღიზიანებს და ის საქართველოს ტერიტორიაზე არ უნდა ტარდებოდეს.

"როდესაც საუბარი იყო ნატოს საწვრთნელი ბაზის შექმნაზე საქართველოში, ახალი მემარჯვენეები მივესალმეთ ამ ფაქტს. ნატოს არაწევრ ქვეყანაში საწვრთნელი ცენტრის შექმნა არის უაღრესად მნიშვნელოვანი. დღეს კი აღმოჩნდა რომ ცალკეული პოლიტიკოსები ამ ცენტრის შექმნას საფრთხედ მიიჩნევენ. ნატო არის რუსეთის აგრესიის შემაკავებელი ერთადერთი საშუალება მსოფლიოს რეალობაში. ეს წვრთნები შეიძლება თავის ტკივილს წარმოადგენს რუსეთისთვის, ან საქართველოში მყოფი რუსეთუმეებისთვის, მაგრამ რეალურად ნატო არის საქართველოს მოსახლეობის სიმშვიდის გარანტი"- აღნიშნა მამუკა კაციტაძემ.

ქართულ-ამერიკული "სწავლება ღირსეული პარტნიორი 2016" ოფიციალურად დაიწყო. მასში 1300 სამხედრო მოსამსახურე მიიღებს მონაწილეობას.

სწავლებაში აშშ-ის არმიის ევროპული სარდლობის 650, 500 ქართველი და 150 ბრიტანელი სამხედრო ჩაერთვება. ისინი ორი კვირის განმავლობაში ვაზიანის სამხედრო პოლიგონზე გაივლიან სწავლებას.

ღირსეული პარტნიორი უკვე მეორედ ტარდება საქართველოში. სწავლება საქართველოს დამოუკიდებლობის დღეს 26 მაისს დასრულდება.