ხელისუფლება საქართველოს პოლიგონად სთავაზობს დასავლეთსა და რუსეთს - ახვლედიანი ქართულ-ამერიკული სწავლებას უარყოფითად აფასებს

პოლიტიკა - 15:24, 11 May, 2016

1345

ნინო ბურჯანაძის პარტია მიიჩნევს, რომ ქართულ-ამერიკული სწავლება ქვეყნისთვის შესაძლოა საფრთხეს წარმოადგენდეს.

ჟურნალისტებთან საუბრისას გიორგი ახვლედიანმა ქართულ-ამერიკული სწავლების დაწყებასთან დაკავშირებით პარალელი 2008 წლის წვრთნებთან გაავლო და აღნიშნა, რომ 8 წლის წინ საქართველო რუსეთთან პირისპირ მარტო დარჩა.

"როდესაც საქართველოში მოქმედი პოლიტიკური ძალები და ხელისუფლებაში მყოფი ადამიანები არ ფიქრობენ იმაზე, რომ საკუთარი ქმედებებით შეიძლება საქართველო როგორც პოლიგონი შესთავაზონ დაპირისპირებულ დასავლეთსა და რუსეთს. საქართველოს კონსტიტუციაში გარკვევით წერია, რომ საქართველოს ტერიტორიაზე უცხო ქვეყნის ჯარის ან ტექნიკის გადაადგილება საქართველოს პარლამენტის ნებართვით უნდა მოხდეს. არ მახსოვს ამ საკითხზე პარლამენტში რაიმე სახის კენჭისყრა ჩატარებულიყო და ნატო-ს სამხედრო ტექნიკისათვის ნებართვა მიეცათ მისულიყვნენ ფოთიდან პოლიგონამდე. სამწუხაროდ, ამგვარი პრეცენდენტები 2008-შიც ნანახი გვაქვს, როცა სიტუაცია კონფლიქტის ესკალაციამდე მივიდა, სადაც საქართველო სრულიად მარტო დარჩა რუსეთის წინაშე. ჩვენივე ქვეყანა არ უნდა გავხადოთ დაპირისპირებული სახელმწიფოების პოლიგონად"- აღნიშნა გიორგი ახვლედიანმა.

ქართულ-ამერიკული "სწავლება ღირსეული პარტნიორი 2016" ოფიციალურად დაიწყო. მასში 1300 სამხედრო მოსამსახურე მიიღებს მონაწილეობას.

სწავლებაში აშშ-ის არმიის ევროპული სარდლობის 650, 500 ქართველი და 150 ბრიტანელი სამხედრო ჩაერთვება. ისინი ორი კვირის განმავლობაში ვაზიანის სამხედრო პოლიგონზე გაივლიან სწავლებას.

ღირსეული პარტნიორი უკვე მეორედ ტარდება საქართველოში. სწავლება საქართველოს დამოუკიდებლობის დღეს 26 მაისს დასრულდება.