სწავლების დასრულების შემდეგ, საქართველოს პირველად ეყოლება NATO-ს ქართული შენაერთი- ხიდაშელი

პოლიტიკა - 14:30, 11 May, 2016

2808

ქართულ-ამერიკული სწავლების - „ღირსეული პარტნიორი 2016“-ის გახსნის ოფიციალური ცერემონიალი ვაზიანის სამხედრო აეროდრომზე იმართება. გახსნნის ცერემონიალს ესწრება საქართველოს პრეზიდენტი, პრემიერ მინისტრი , თავდაცვის მინისტრი, აღმასრულებელი და საკანონმდებლო ხელისუფლების წარმომადგენლები და საქართველოში აკრედიტებული დიპლომატიური კორპუსი. თავდაცვის უწყების ხელმძღვანელმა თინათინ ხიდაშელმა ქართველ, ამერიკელ და ბრიტანელ სამხედროებს სიტყვით მიმართა. თავდაცვის მინისტრის განცხადებით ამ სწავლების დასრულების შემდეგ საქართველოს პირველად ეყოლება ნატოს რეაგირების ძალების სერთიფიცირებული ქართული შენაერთი. ხიდაშელის თქმით საქართველო აუცილებლად გახდება ნატოს წევრი ისევე როგორც ბალტიის ქცვეყნები, ასევე ალბანეთი და მონტენეგრო და როგორც ორად გაყოფილი გერმანია თავის დროზე:

„განსაკუთრებით მინდა მივესალმო ახალგაზრდებს, რომლებიც ამ ღონისძიებას შემოუერთდნენ და ჩვენტან ერთად იღებენ მონაწილეობას ამ ძალიან მნიშვნელოვან დღესასწაულში. ორი ძალიან კარგი ამბავი მინდა გითხრათ, ერთზე პრეზიდენტმა უკვე ისაუბრა, საქართველო აუცილებლად გახდება ნატოს წევრი, აუცილებლად გახდება ამ დემოკრატიული ქვეყნების ერთობის, ოჯახის წევრი, ზუსტად ისე როგორც ლიტვა და ლატვია, ისე როგორც ალბანეთი და მონტენეგრო სულ ახლახანს და ზუსტად ისე როგორც ორად გაყოფილი გერმანია თავის დროზე. ერთიანი, თავისუფალი დემოკრატიული საქართველო თავისი შეიარაღებული ძალებით. რატომ არის ეს წვრთნები ასეთი მნიშვნელოვანი და განსაკუთრებული? ამისთვის ძალიან ბევრი მიზეზია, მაგრამ მათ შორის ერთ-ერთი მთავარი მიზეზი არის ის, რომ ამ სწავლების დასრულების შემდეგ საქართველოს პირველად ეყოლება ნატოს რეაგირების ძალების სერთიფიცირებული შენაერთი, პირველი, ოფიციალური, ნატოს ქართული შენაერთი ნატოს სამკლაურებით. მეორე კარგი ამბავი არის ის რომ ის ახალგაზრდები, რომლებიც ამ სწავლებას შემოუერთდნენ არიან საუკეთესო გზავნილი მტრისთვის და მოყვარისთვის, აგრესორისთვის და პარტნიორისთვის, რომ აქ, ამ მიწაზე არასოდეს იქნება ხელისუფლება, რომელიც ოკუპაციას შეეგუება, რომ ჩვენ სამშობლოში აგრესორებს გაშლილი დროშებით არასოდეს არ დახვდებიან, სწორედ ეს თაობა უზრუნველყოფს, რომ ჩვენი ევროატლანტიკური არჩევანი ურყევი და შეუცვლელი იყოს“- განაცხადა თინათინ ხიდაშელმა.