უმაღლეს საკანონმდებლო ორგანოში დაგეგმილ სხდომაზე დღეს საინიციატივო ჯგუფის მიერ წარდგენილი წინადადების კენჭისყრა უნდა მოხდეს. საუბარია წინადადებაზე, რომელიც საარჩევნო სისტემის შეცვლას ითვალისწინებს და მაჟორიტარული სისტემის გაუქმებას 2016 წლის საპარლამენტო არჩევნებისთვის.

საპარლამენტო უმრავლესობას კი შეაქვს წინადადება, რომ სისტემა არა 2016 წლის, არამედ 2020 წლის არჩევნებისთვის უნდა შეიცვალოს, დღევანდელ სხდომაზე ამ წინადადების განხილვაა დაგეგმილი.

წინასწარ ცნობილია, რომ საინიციატივო ჯგუფის წინადადებას, უმრავლესობის დიდი მხარდაჭერა არ ექნება. მიუხედავად ამისა, „რესპუბლიკურ პარტიაში“ აცხადებენ, რომ მხარს დაუჭერენ როგორც უმრავლესობის, ასევე უმცირესობის წინადადებებს:

„რესპუბლიკური პარტია მხარს უჭერს როგორც უმცირესობის წინადადებას, ისე უმრავლესობის წინადადებას. ჩვენ მოწოდებული ვართ, რომ საარჩევნო კოდექსში ცვლილებები შევიდეს. მე ვწუხვარ, რომ არც ერთს და არც მეორეს რაღაც არ უჩანს მაინცდამაინც მაღალი შანსი, რომ გავიდეს. ასეთ შემთხვევაში, რაღაც მოქმედების გეგმაც შეიძლება იქნას მოფიქრებული, მაგრამ მანამდე იქნება განხილვა უმრავლესობის წინადადების ,“ - განაცხადა ლევან ბერძენიშვილმა.