უმრავლესობა გიორგი მარგველაშვილის განცხადებას პასუხობს და არ იზიარებს მის შეფასებას, უმრავლესობის მხრიდან პრეზიდენტის ინსტიტუტის მიზანმიმართულ შესუსტებასა და დისკრედიტაციაზე.

რაც შეეხება უზენაესი სასამართლოს მოსამართლეობის კანდიდატებს, რომელთა დროული დანიშვნისკენ მოუწოდა მარგველაშვილმა პარლამენტს, უმრავლესობაში აცხადებენ, რომ ისინი ნაჩქარევ გადაწყვეტილებას ვერ მიიღებენ.

„არ მგონია, რომ რომელიმე ინსტიტუციამ ასე უნდა დაინახოს პარლამენტი, რომ რასაც მიაწვდის მას, პარლამენტმა იგი კრიტიკის გარეშე მიიღოს.პარლამენტს სულ მინიმუმ აქვს განსჯის, შიდა შეთანხმების უფლება, პარლამენტი არ არის ორგანო, რომელიც ჩაქუჩს დაარტყამს და გადაწყვეტილებებს ისე მიიღებს. ამიტომ მეტი პატივისცემით უნდა მოვეპყრათ მას“, - განაცხადა ეკა ბესელიამ.

საპარლამენტო უმცირესობა გიორგი მარგველშვილის შენიშვნებს ეთანხმება და მიაჩნია, რომ პროცესები ჭიანურდება.

„ნათელია, რომ ხელისუფლება ცდილობს დააკნინოს საკონსტიტუციო სასამართლოს, როგორც ინსტიტუციის მნიშვნელობა და ერთგვარად შური იძიოს მასზე. რაც შეეხება ამ კანდიდატურებს, მათთან დაკავშირებით სხვადასხვა მოსაზრებები არსებობს, აშკარაა, რომ იქ პოლიტიკური მოტივაციებიც ჩანს“, - მიიჩნევს გიორგი ბარამიძე.

განცხადება, რომელსაც დეპუტატებმა უპასუხეს, პრეზიდენტმა მარგველაშვილმა გუშინ გააკეთა, სადაც „ქართულ ოცნებასა“ და „რესპუბლიკურ პარტიას“ შორის არსებულ გაურკვევლობაზე ისაუბრა.