წინასაარჩევნო კამპანიის დაწყების თარიღად 8 ივნისის განსაზღვრას დადებითად აფასებენ უმრავლესობასა და ოპოზიციაში. მათი განცხადებით, 4 თვე სრულებით საკმარისია პარტიებისათვის, აწარმოონ სრულყოფილი წინასაარჩევნო კამპანია.

„საკმარისზე მეტია ალბათ 8 ივნისი. მაგრამ ჩვენ მზად ვართ მივიღოთ, რადგან მიღებულია ეს გადაწყვეტილება, იგი საერთოა. კონსესუსი უფრო მიხარია, ვიდრე ანალიზს ვუკეთებ ამ თარიღს“, - განაცხადა გია ვოლსკიმ.

უმრავლესობის ნაწილს მიაჩნია, რომ 4 თვიანი კამპანია დამატებით ხარჯებს საჭიროებს:

„მიმაჩნია, რომ 4 თვე მართლაც ბევრია, უბრალოდ პრაქტიკაში არ გვქონია. ხარჯებთან იქნება დაკავშირებული. რა თქმა უნდა დააზარალებს ზედმეტი ხარჯები, შესაძლებელი იყო გამოყენებული ყოფილიყო სხვადასხვა უფრო მნიშვნელოვანი მიმართულებებით. უკეთესი იქნებოდა, მაგრამ ჩვენ ვართ ფაქტის წინაშე“, - აღნიშნა თამაზ მეჭიაურმა.

ენმ კი მიიჩნევს, რომ პრეზიდენტს გარკვეული ზეწოლა აქვს მთავრობისგან, თუმცა, წინასაარჩევნო კამპანიის დაწყების თარიღად 8 ივნისის განსაზღვრა საპარლამენტო ოპოზიციისთვისაც მისაღებია:

„პრეზიდენტს აქვს ის ზეწოლა მთავრობიდან, რომელიც არ უნდა იყოს, პრეზიდენტი ამ ყველაფერზე მაღლა უნდა იყოს და ამგვარი ზეწოლებისგან თავისუფალი. თუმცა, მაინც მნიშვნელოვანია, რომ ეს თარიღი დაინიშნა, მიუხედავად იმისა, რომ ეს არასაჭირო კომპრომისი მაინც დაუშვა პრეზიდენტმა“, - აცხადებს გიორგი ბარამიძე.

„თავისუფალი დემოკრატები“ კი მიესალმებიან იმ ფაქტს, რომ საბოლოოდ ჩამოყალიბდა ორი ინსტიტუცია და თარიღის დანიშვნა შესაძლებელი გახდა:

„კარგია, რომ ბოლოსდაბოლოს პრემიერ-მინისტრი და პრეზიდენტი შეთანხმდენენ იმასთან დაკავშირებით თუ როდის დაიწყებოდა ქვეყანაში საარჩევნო კამპანიასთან დაკავშირებული სამართლებრივი რეგულაციების ამოქმედება. რაც უფრო ადრე, მით უკეთესი. ზოგადად არ არის სასიამოვნო, როდესაც ორი ინსტიტუცია კინკლაობს ერთმანეთში. საერთო ჯამში ჩვენთვის, „თავისუფალი დემოკრატებისთვის“, არსებითი მნიშვნელობა არ აქვს, ჩვენ ჩვენი დღისწესრიგი გაგვაჩნია“, - მიიჩნევს ირაკლი ჩიქოვანი.

თამარ კორძაიაც დადებითად აფასებს პრეზიდენტის მიერ მიღებულ გადაწყვეტილებას:

„8 ივნისს საარჩევნო კამპანიის დაწყება არის სავსებით ნორმალური და მისაღები ფაქტი. კარგია ის, რომ საქართველოს პარლამენტის თავმჯდომარის, დავით უსუფაშვილის მონაწილეობით, პრემიერ-მინისტრმა და პრეზიდენტმა მოახერხეს შეთანხმება არჩევნების თარიღის დანიშვნასთან დაკავშირებით“, - განაცხადა თამარ კორძაიამ.

წინასაარჩევნო კამპანიის დაწყების თარიღი პრეზიდენტმა გუშინ გამოაცხადა. მანამდე კი კონსულტაციები გაიმართა გიორგი მარგველაშვილს, გიორგი კვირიკაშვილსა და დავით უსუფაშვილს შორის.