რა პასუხი გასცა პრეზიდენტმა პირველი გიმნაზიის მოსწავლეებს ერთსქესიანთა ქორწინებაზე

რა პასუხი გასცა პრეზიდენტმა პირველი გიმნაზიის მოსწავლეებს ერთსქესიანთა ქორწინებაზე - ვიდეო

პოლიტიკა - 14:23, 10 May, 2016

5551

ევროინტეგრაცია და საქართველოს ევროპული მომავალი - გიორგი მარგველაშვილმა ლექცია ამ თემაზე პირველ გიმნაზიაში წაიკითხა. პრეზიდენტმა მოსწავლეების შეკითხვებასაც უპასუხა, სადაც ერთ-ერთი მთავარი თემა ერთსქესიანთა ქორწინება იყო. მან საკონსტიტუციო ცვლილებებს მოგონილი უწოდა.

„ჩემი აზრით ქართველი ადამიანი არასდროს არ აღიარებს იმას, რომ მის სახელმწიფოში ერთსქესიანთა ქორწინება დასაშვები იყოს, ვიცით, რომ ევროპულ ქვეყნებში ეს მისაღებია“, - მიმართა ერთ-ერთმა მოსწავლემ პრეზიდენტს:

„ზოგ ევროპულ ქვეყანაში მისაღებია, ზოგში არ არის, მაგრამ როდესაც ამბობთ „ქართველი ადამიანი“, როდესაც ამაზე საუბრობთ, რატომ აკეთებთ იდენტიფიცირებას ამ თემისას ქართულ კულტურასთან? მე მგონია, რომ ეს არის მოგონილი თემა. იმის მაგივრად, რომ მე დავჯდე და დავიწყო ფიქრი ვინ ვარ მე? დავიწყო ფიქრი როგორ იფიქრებდა ილია ჭავჭავაძე, როგორ იფიქრებდა ვაჟა-ფშაველა, დავუბრუნდე რუსთაველს, დავუბრუნდე ჩემს წინაპრებს და ძალიან დრამატული, ინტელექტუალური პროცესი გავიარო ნებისმიერ ასეთ საკითხთან მიმართებით, ამის მაგივრად მე მაძლევენ მზა რეცეპტს, რომ ქართველობა ეს არის ქორწინების საკითხი“, - განაცხადა კითხვის პასუხად პრეზიდენტმა.

მისივე თქმით, ქორწინების მიმართ პოზიცია საერთოდ არ არის ჩამოსაყალიბებელი:

„ქორწინების მიმართ პოზიცია საერთოდ არ არის ჩამოსაყალიბებელი, იმიტომ რომ უკვე ჩამოყალიბებულია. ამაზე უნდა ვილაპარაკოთ, როცა გვშია და ოკუპირებულები ვართ? რატომ ვიწვევთ ქარიშხალს ჭიქაში. ეს იმიტომ ხდება, რომ ადამიანებმა არ ისაუბრონ გაჭირვებაზე, სამუშაო ადგილებზე. ამაზე საუბარი მათთვის გამოსავალია. თითქოს, ეს პრობლემაა და ქორწინების სახლთან ერთსქესიანთა წყვილების რიგებია და მათ ქორწინებისთვის პრობლემები ექმნებათ. ეს გამოგონილი თემაა“- დასძინა მარგველაშვილმა.