თამაზ მეჭიაური ლევან ბერძენიშვილს პასუხობს. იგი საკუთარ პირობებს აყენებს და აცხადებს, რომ „ქართულ ოცნებას“ იმ შემთხვევაში დატოვებს, თუ თანამდებობებიდან რესპუბლიკელი მინისტრებიც გადადგებიან.

„თუ სატელიტი პარტია ჰგონიათ მათ, როგორც აქამდე იყო, სატელიტ პარტიად რომ იყენებდნენ „ქართულ ოცნებას“ და ფაქტობრივად აიღეს ნახევარზე მეტი ხელისუფლება, ახლა იგივეს აგრძელებენ, ამით თავისთავად ამ ხელისუფლებას არტყავენ და მათ ავტორიტეტს რისკის ქვეშ აყენებენ. თუ ეს ხელისუფლება გაიზიარებს ამ ორი მკვდარი პოლიტიკოსის აზრს და გაემიჯნება იმ ძალებს, რომლებსაც უფრო მეტად აქვთ ხალხთან შეხება და ხალხის სათქმელს იძახიან, თუ დაიტოვებენ ისეთ მარგინალებს, როგორცი ესენი არიან, ეს პოლიტიკოსები ბრჭყალებში, მაშინ თავის თავს გაუკეთებენ დისკრედიტაციას. თუ კვირიკაშვილი მიირებს გადაწყვეტილებას და დღესვე გაათავისუფლებს მათ თანამდებობებიდან, ეს ყველაზე ლოგიკური იქნება. მე მას არ შევუქმნი პრობლემებს, რომ ჩემი გარიცხვა არგარიცხვის საკითხზე მოუწიოს მსჯელობა და მე მივიღებ ისეთ გადაწყვეტილებას, რომელიც მისთვისაც მისაღები იქნება“, - განაცხადა მეჭიაურმა.

შეგახსენებთ, რომ ლევან ბერძენიშვილის აზრით, ქვეყნის საგარეო კურსთან დაკავშირებით გაკეთებული რადიკალურად განსხვავებული განცხადებების გამო თამაზ მეჭიაური პარტიიდან უნდა გაირიცხოს. ეს განცხადება, ბერძენიშვილმა მეჭიაურის სკანდალურ კომენტარებზე საპასუხოდ გააკეთა.