"სუბარი და გაბუნია პრობლემას უყრუებს" - ღია ცისქვეშ დარჩებილი დევნილები აქციით იმურებიან

პოლიტიკა - 13:04, 10 May, 2016

2304

თბილისში გუშინ გვიან ღამით მოსულმა უხვმა ნალექმა ნაძალადევის რაიონში მდებარე დევნილთა დასახლებას პრობლემები შეუქმნა.

როგორც "ნიუპოსტს" ღოღობერიძის 3 ნომერში მცხოვრებმა იძულებით გადაადგილებულმა პირებმა აცნობეს, დაზიანდა სახურავი და მთელი ღამე აწვიმდათ.

მათი თქმით, დასახმარებლად ნაძალადევის გამგეობას მიმართეს, თუმცა უწყებაში მათ განუცხადეს, რომ დაზიანებული სახურავის შეკეთება არა მათი არამედ დევნილთა და განსახლების სამინსიტროს პრეროგატივაა.

თავის მხრივ სუბარის უწყებამ დევნილებს უთხრა, რომ ვინაიდან ეს ობიექტი 2013 წელს გარემონტდა და სახელმწიფომ დევნილებს საკუთრებაში გადასცა, პრობლემის მოგვარებაზე თავად დევნილებმა უნდა იზრუნონ.

"გარემონტებულ კორპუსს წვიმამ სახურავი ახადა, დევნილთა მინისტრი სუბარი და გამგებელი ზაზა გაბუნია პრობლემას უყრუებს" - აღნიშნა ერთ-ერთმა დევნილმა.

მისი თქმით, აქციას დევნილთა სამინისტროს პარალელურად ნაძალადევის გამგეობასთანაც გამართავენ.

"ნიუპოსტი" დევნილთა სამინისტროსაც დაუკავშირდა. სუბარის უწყებაში აღნიშნეს, რომ ისინი საკუთრებაში გადაცემული საცხოვრებლების ხელახლა შეკეთებას არ უზრუნველყოფენ.

"აღნიშნული შენობა დევნილებს საკუთრებაში აქვთ გადაცემული, პრობლემის მოგვარება ამხანაგობის და მუნიციპალიტეტის თემაა"- აღნიშნეს დევნილთა სამინისტროში.

რაც შეეხება ნაძალადევის რაიონის გამგებელს - ზაზა გაბუნიამ "ნიუპოსტის" სატელეფონო ზარებს არ უპასუხა.