თამაზ მეჭიაურის განცხადებაზე პრემიერ-მინისტრის კომენტარს „რესპუბლიკურ პარტიაში“ დაგვიანებულად მიიჩნევენ და „ქართულ ოცნებაში“ არსებულ კრიზისზე საუბრობენ.

ლევან ბერძენიშვილის აზრით, ქვეყნის საგარეო კურსთან დაკავშირებით გაკეთებული რადიკალურად განსხვავებული განცხადებების გამო თამაზ მეჭიაური პარტიიდან უნდა გაირიცხოს.

„პრემიერ-მინისტრის განცხადება არის სწორი, მაგრამ ორი ნაკლი აქვს. ცოტა დააგვიანა და ნაკლებად მძაფრია. ვისაც ჰგონია, რომ ნატო აბსურდია, იმას ევროპაც აბსურდი ჰგონია და არც სამშობლო უყვარს. უნდა გარიცხონ, თუ აქვთ ამის უნარი, ეჭვი მეპარება, რომ რამე შეეძლოთ, ამიტომ მეჭიაური კიდევ გააკეთებს ასეთ განცხადებას, რაც იმას ნიშნავს, რომ ეს პარტია უდისციპლინო წევრებისგან შედგება, არ ჰყავს სერიოზული მენეჯმენტი და პრობლემები აქვს“, - აღნიშნა ლევან ბერძენიშვილმა.

„რესპუბლიკური პარტიის“ წევრმა ასევე კომენტარი გააკეთა პრემიერის განცხადებაზე პაატა ზაქარეიშვილთან მიმართებით, რომელიც გუშინ თამაზ მეჭიაურის მიერ გაკეთებულ კომენტარს გამოეხმაურა:

„პაატა ზაქარეიშვილი არის მინისტრი და ემორჩილება პრემიერ-მინისტრს, ხოლო მე ვარ კაცი, რომელმაც პრემიერ-მინისტრი დაამტკიცა, მე მას არ ვემორჩილები და მიმაჩნია, რომ მცდარი განცხადება გააკეთა“, - დასძინა ბერძენიშვილმა.

შეგახსენებთ, მმართველი პარტიის წევრმა თამაზ მეჭიაურმა 11-26 მაისს საქართველოში დაგეგმილი ქართულ- ამერიკული წვრთნები საფრთხის მომტანად შეაფასა და აღნიშნა, რომ მაშინ როდესაც რეგიონში დაძაბული ვითარებაა, საქართველოს ტერიტორიაზე სამხედრო ძალის კონცენტრაცია არ უნდა ხდებოდეს.

მეჭიაური საქართველოს ნატო-ში ინტეგრაციის საკითხს კიდევ ერთხელ გამოეხმაურა. იგი კვლავ აცხადებს, რომ ნატო-ს გაფართოება არ იგეგმება, შესაბამისად საქართველოს ინტეგრაციაც არ მოხდება.

აღნიშნულ განცხადებას პაატა ზაქარეიშვილი გამოეხმაურა, მინისტრისთვის გაუგებარია რატომ მოჰყვა წვრთნებს წელს ასეთი აჟიოტაჟი, მაშინ როცა ის შარშანაც ჩატარდა. ამასთანავე ზაქარეიშვილის შეფასებით მისთვის მნიშვნელოვანია ის ფაქტი თუ როგორ უყურებს ამ წვრთნებს და შესაბამისად მეჭიაურის განცხადებას თავად „ქართული ოცნება“.

მინისტრისა და უმრავლესობის წევრის განცხადებებს პრემიერ-მინისტრმა გუშინ უპასუხა. მან აღნიშნა, რომ მეჭიაურის განცხადება არის აბსოლუტურად აცილებული "ქართული ოცნების"საგარეო პოლიტიკურ კურსს.

რაც შეეხება ზაქარეიშვილის განცხადებას, გიორგი კვირიკაშვილის თქმით ზაქარეიშვილის მხრიდან წამოსული კრიტიკა არაობიექტური და მიუღებელია.