მოსალოდნელი სამთავრობო ცვლილებები - ვინ ჩაანაცვლებს "რესპუბლიკელ" მინისტრებს

პოლიტიკა - 10:32, 10 May, 2016

5892

გავრცელებული ინფორმაციით 3 "რესპუბლიკელი" მინისტრი თანამდებობას დროზე ადრე დატოვებს, გაზეთი „რეზონანსი“ შესაძლო შემცვლელების ვინაობაზეც წერს. არსებული ინფორმაციით, თინა ხიდაშელს თავდაცვის მინისტრის პოსტზე ირაკლი სესაიშვილი, გიგლა აგულაშვილს კი გარემოს დაცვის მინისტრის თანამდებობაზე ნინო სულხანიშვილი ჩაანაცვლებს, შერიგებისა და სამოქალაქო თანასწორობის საკითხებში სახელმწიფო მინისტრის პაატა ზაქარეიშვილის ადგილს კი ქეთევან ციხელაშვილი დაიკავებს.
"ნიუპოსტი" ინფორმაციის გადასამოწმებლად "რესპუბლიკური პარტიის" ერთ-ერთ ლიდერს ლევან ბერძენიშვილს დაუკავშირდა. დეპუტატის თქმით, "რესპუბლიკელი" მინისტრების მიერ თანამდებობების დროზე ადრე შესაძლო დატოვებს შესახებ არაფერი იცის.
"არაფერი ვიცი, მე ასეთ ინფორმაციას არ ვიცნობ"- აღნიშნა ბერძენიშვილმა.

"რესპუბლიკელი" მინისტრების მიერ თანამდებობის მოსალოდნელი დატოვების შესახებ ინფორმაცია ჯერ კიდევ მაშინ გავრცელდა, როდესაც რესპუბლიკურმა პარტიამ არჩევნებში დამოუკიდებლად მონაწილეობის გადაწყვეტილება მიიღო. მორიგ ჯერზე საკითხი აქტუალური მას შემდეგ გახდა, რაც "ქართული ოცნების" რამდენიმე წევრის მიერ გაკეთებული ანტინატოურ განცხადებებზე დუმილის გამო, მინისტრმა პაატა ზაქარეიშვილმა მმართველი გუნდი გააკრიტიკა.