"პრემიერის განცხადება არ იყო ობიექტური"- "რესპუბლიკური პარტიის" თავმჯდომარე

პოლიტიკა - 20:28, 09 May, 2016

1863

„რესპუბლიკური პარტიის“ ხელმძღვანელი ხათუნა სამნიძე, პაატა ზაქარეიშვილტან დაკავშირებით პრემიერ-მინისტრის გაკეთებულ განცხადებას არაობიექტურს უწოდებს.

"პრემიერის განცხადება, ვფიქრობ, არ იყო ობიექტური, რადგან პაატა ზაქარეიშვილმა პასუხი მოითხოვა პარტია "ქართული ოცნების" ლიდერებისგან და არა მთავრობის წევრებისგან. აუცილებელია, რომ პასუხი გაეცეს მეჭიაურის განცხადებებს, რომელიც საფრთხეს უქმნის მთელ ქვეყანას. იმედს ვიტოვებთ, რომ პრემიერი ობიექტურად შეაფასებს ამ პროცესს და ქვეყნის ინტერესებიდან გამომდინარე მიიღებს გადაწყვეტილებას." - განაცხადა ხათუნა სამნიძემ.

შეგახსენებთ, შერიგებისა და სამოქალაქო თანასწორობის საკითხებში სახელმწიფო მინისტრი „რესპუბლიკელი“ მინისტრი პაატა ზაქარეიშვილი „ქართული ოცნების“ წევრის თამაზ მეჭიაურის მიერ ქართულ-ამერიკულ წვრთნებთან დაკავშირებით გაკეთებულ განცხადებას გამოეხმაურა და აღნიშნა, რომ მისთვის მნიშვნელოვანია ის ფაქტი თუ როგორ უყურებს ამ წვრთნებს და შესაბამისად მეჭიაურის განცხადებას თავად „ქართული ოცნება“. მინისტრის ეს განცხადება პრემიერის მხრიდან კრიტიკის საგანი გახდა, კვირიკაშვილის თქმით ზაქარეიშვილის მხრიდან წამოსული კრიტიკა, იმასთან დაკავშირებით რომ "ქართული ოცნება" მეჭიაურის ანტინატოურ განცხადებებთან დაკავშირებით დუმს, არაობიექტური და მიუღებელია. "თუ მას გააჩნია სხვა მოსაზრებები, მიიღოს ჩვეულებრივი ადამიანური გადაწყვეტილება"- განაცხადა კვირიკაშვილმა.

მმართველი პარტიის წევრმა თამაზ მეჭიაურმა 11-26 მაისს საქართველოში დაგეგმილი ქართულ- ამერიკული წვრთნები საფრთხის მომტანად შეაფასა და აღნიშნა, რომ მაშინ როდესაც რეგიონში დაძაბული ვითარებაა, საქართველოს ტერიტორიაზე სამხედრო ძალის კონცენტრაცია არ უნდა ხდებოდეს.