პაატა ბურჭულაძემ ვაკის პარკში მეორე მსოფლიო ომის დროს დაღუპულ ადამიანებს პატივი მიაგო

პოლიტიკა - 18:15, 09 May, 2016

1554

ფაშიზმზე გამარჯვების 71–ე წლისთავთან დაკავშირებით “საქართველოს განვითარების ფონდის“ დამფუძნებელმა პაატა ბურჭულაძემ ვაკის პარკში მეორე მსოფლიო ომის დროს დაღუპულ ადამიანებს პატივი მიაგო და უცნობი ჯარისკაცის მემორიალი გვირგვინით შეამკო.

„ჩვენმა ქვეყანამ დიდი წვლილი შეიტანა ნაციზმისა და ფაშიზმის დამარცხების საქმეში. მიუხედავად ჩვენი მცირერიცხოვნობისა, ეს იყო ერთ-ერთი ყველაზე მნიშვნელოვანი ძალისხმევა მეორე მსოფლიო ომში.

ქართველი ერი, დანარჩენ მსოფლიოსთან ერთად, წინ აღუდგა ბოროტებას. ბოროტებას, რომელიც სრული განადგურებით ემუქრებოდა მსოფლიოს. ქართველმა ხალხმა უზარმაზარი მსხვერპლი გაიღო საერთაშორისო მშვიდობისა და თავისუფლებისთვის.

მინდა ეს დღე მივულოცო ჩვენი ქვეყნის ვეტერანებს და თითოეულ მოქალაქეს, ვისთვისაც მნიშვნელოვანია დავიცვათ თავისუფლება და ნათელი ღირებულებები. ბოროტებას ყოველთვის სძლევს სიკეთე და ესაა ჩვენი არსებობის, ჩვენი შრომისა და ბრძოლის მთავარი აზრი, ჩვენი და მთელი ცივილიზებული კაცობრიობის მთავარი მიმართება. სწორედ ეს აზრი, ისტორიულ გამოცდილებასთან ერთად, გვაძლევს იმედს იმისას, რომ საქართველოშიც აუცილებლად დასრულდება ის მანკიერებები და წარუმატებლობები, უსამართლობისა და უპერსპექტივობის განცდა, ქვეყნის ოკუპაცია და თავისუფლების ხელყოფა, რაც ასე აფერხებს საქართველოს განვითარებას, საქართველოს მოქალაქეებისთვის ღირსეული ყოფისა და პირობების შექმნას.“ - განაცხადა პაატა ბურჭულაძემ.