ბერძენიშვილი ივანიშვილს პასუხს სთხოვს - ,,დააფიქსიროს თავისი პოზიცია ნატოსთან დაკავშირებით"

პოლიტიკა - 16:54, 09 May, 2016

2462

დავით ბერძენიშვილი ბიძინა ივანიშვილს მიმართავს, „რესპუბლიკელი“ დეპუტატის თქმით იმ სიტუაციაში, როდესაც ბიძინა ივანიშვილის მეგობრები, მეჭიაური და თოფაძე ნატოს საწინააღმდეგო განცხადბეებს მსგავს განცხადებებს აკეთებენ, აუცილებელია, რომ მან დააფიქსიროს თავისი პოზიცია ნატოსთან დაკავშირებით:

„მე მინდა მივმართო ბიძინა ივანიშვილს, როგორც მეჭიაური ასევე თოფაძე აცხადებენ, რომ ისინი არიან ბიძინა ივანიშვილის მეგობრები. საზოგადოებაში ფეხს იკიდებს პოზიცია, რომ ისინი ბიძინა ივანიშვილის პოზიციებს აჟღერებენ. ივანიშვილის დამოკიდებულება ნატოსთან დაკავშირებით როგორია, ამასთან დაკავშირებით მან მყისიერი , მკაფიო პასუხი უნდა გასცეს, რათა არ მიეცეს პროვოკაციების და სპეკულაციების საშუალება მის მიერ ხელდასხმულ და მისი პატრონაჟით მოყოჩაღებულ თოფაძეს თუ მეჭიაურს. ეს პატრონაჟი რომაა არცერთ მხარეს არ დაუმალავს, სანამ კომიტეტის თავმჯდომარე გახდებოდა მეჭიაური ერთი უწყინარი, უჩინარი დეპუტატი იყო და მისი ხმა არ ისმოდა არც ამ და არც ძველი მოწვევის პარლამენტში.

მივმართავ ყოფილ პრემიერს და „ქართული ოცნების“ დამფუძნებელს და რეალურ მთავარ ორიენტირს ბიძინა ივანიშვილს, დააფიქსიროს თავისი პოზიცია ნატოსთან დაკავშირებით. მას ყოველთვის ქონდა პოზიცია, რომ ჩვენ ევროკავშირიც გვინდა და ნატოც. მეჭიაური და თოფაძე ქართულ საზოგადოებას ეუბნებიან, თვალს უკრავენ, რომ „პრინციპში ნატო რომ არ გვინდა ეს მარტო ჩვენი აზრი არ არის“. ამიტომ ივანიშვილმა საკუთარი რეპუტაცია უნდა დაიცვას ამ თვალსაზრისით.“- აღნიშნა ბერძენიშვილმა.