"თუ სხვა მოსაზრებები აქვს, მიიღოს გადაწყვეტილება"- პრემიერი ზაქარეიშვილს გადადგომისკენ მოუწოდებს?

პოლიტიკა - 14:16, 09 May, 2016

3702

მინისტრ პაატა ზაქარეიშვილის განცხადებას იმასთან იმასთან დაკავშირებით, რომ მას მეჭიაურის განცხადებებზე უფრო მეტად, ამ განცხადბებთან მიმართებაში „ქართული ოცნების“ დუმილი აკვირვებს, მთავრობის მეთაური გამოეხმაურა. გიორგი კვირიკაშვილის თქმით ზაქარეიშვილის მხრიდან წამოსული კრიტიკა არაობიექტური და მიუღებელია.

„რაც შეეხება პაატა ზაქარეიშვილის განცხადებას, რომ მას აკვირვებს ამ საკითზე ქართული ოცნების დუმილი. მე მაკვირვებს ზაქარეიშვილის განცხადება, იმიტომ რომ ეს უპირველეს ყოვლისა არის აბსოლუტურად არაობიექტური განცხადება, იმიტომ რომ საქართველოს მთავრობის მხრიდან და პარლამენტარების მხრიდანაც გაკეთდა არაერთი განცხადება და კიდევ ერთხელ ვამბობ რომ ჩვენ გვაქვს ძალიან მკაფიო საგარეო პოლიტიკური პრიორიტეტები, რომლის დადასტურებაც არაერთხელ მოხდა საგარეო თუ საშინაო ფორმატში, რაც შეეხება იმას, რომ საქართველოს მთავრობის წევრი გამოხატავს უკმაყოფილებას საქართველოს მთავრობის, მისი აზრით დუმილის გამო, ეს არის მისი გადაწყვეტილება. თუ მას გააჩნია სხვა მოსაზრებები, მიიღოს ჩვეულებრივი ადამიანური გადაწყვეტილება, იმიტომ, რომ მე მიმაჩნია, მთავრობის წევრის მხრიდან მმართველი ძალის არაობიექტური კრიტიკა არის ძალიან გასაკვირი უპირველეს ყოვლისა და მეორეს მხრივ მიუღებელიც. ამიტომ ძალიან გული მტკივა ამ განცხადების გამო. მე ვადასტურებ რომ ძალიან დიდ პატივს ვცემ პაატა ზაქარეიშვილს, მაგრამ მისი განცხადება იყო ნაჩქარევი და ობიექტურობას დაშორებული“- განაცხადა გიორგი კვირიკაშვილმა.

შეგახსენებთ განცხადება, რომლის გამოც პაატა ზაქარეიშვილმა პრემიერის მხრიდან კრიტიკა დაიმსახურა შერიგებისა და სამოქალაქო თანასწორობის საკითხებში სახელმწიფო მინისტრმა თამაზ მეჭიაურის საპასუხოდ გააკეთა

მმართველი პარტიის წევრმა თამაზ მეჭიაურმა 11-26 მაისს საქართველოში დაგეგმილი ქართულ- ამერიკული წვრთნები საფრთხის მომტანად შეაფასა და აღნიშნა, რომ მაშინ როდესაც რეგიონში დაძაბული ვითარებაა, საქართველოს ტერიტორიაზე სამხედრო ძალის კონცენტრაცია არ უნდა ხდებოდეს.