ინტერპარტიული ჯგუფი საპარლამენტო ოპოზიციასთან არჩევნების გერმანული მოდელთან დაკავშირებით კონსულტაციებს გამართავს

პოლიტიკა - 12:49, 09 May, 2016

1267

მიმდინარე კვირაში საქართველოს საკანონმდებლო ორგანოში საარჩევნო სისტემის გერმანული მოდელის ინიცირება იგეგმება. ამ საკითხთან დაკავშირებით ინტერპარტიული ჯგუფი საპარლამენტო ოპოზიციასთან კონსულტაციების გამართვას იწყებს, რომლის შემდეგაც გადაწყდება რომელი პოლიტიკური პარტია წარადგენს უშუალოდ ამ მოდელს საკანონმდელო ორგანოში.

პოლიტიკური გაერთიანება „სამოქალაქო ალიანსი თავისუფლებისთვის“ თავმჯდომარის ზურაბ ხარატიშვილის თქმით არსებულ ვითარებაში გერმანული მოდელი ყველაზე მისაღებია, რადგან ის არ საჭიროებს საკონსტიტუციო ცვლილებებს.

„გერმანული მოდელი ყველაზე ოპტიმალურია, რადგან ის ერთის მხრივ ინარჩუნებს მაჟორიტარულ და პროპორციულ სისტემას, მაგრამ რაც მთავარია ადგილების განაწილება ხდება საერთო პროპორციული რაოდენობიდან. ნებისმიერი პოლიტიკური გაერთიანება და საარჩევნო სუბიექტი მიიღებს იმდენ მანდატს, რა პროპორციითაც მიიღებს საერთო არჩევნებიდან ხმებს. ვფიქრობთ ამ კვირის ბოლომდე ამის ინიცირება მოხდება“- განაცხადა ხარატიშვილმა.

ეროვნულ დემოკრატიული პარტიის ლიდერის ბაჩუკი ქარდავას შეფასებით, გერმანული მოდელის მიღების შემთხვევაში საარჩევნო სისტემის გაუმჯობესების მხრივ რევოლუციური რეფორმა მოხდება. თუმცა როგორც ქარდავა აღნიშნავს, ამის ხელისშესაშლელად ხელისუფლება ყველაფერს გააკეთებს, რადგან არსებული მოდელის გარეშე მმართველ გუნდს არჩევნებში გამარჯვება გაუჭირდება:

„გერმანული მოდელი იქნება აქტუალური ამ კვირაში და გვაქვს შანსი, რომ კარგი გაგებით, რევოლუციური რეფორმა მოხდეს საარჩევნო სისტემაში 2016 წლისთვის. ამას ელემენტარულად სჭირდება ყველა ოპოზიციონერის მხარდაჭერა. ხელისუფლებას მყარად აქვს ჩამოყალიბებული თავისი პოზიცია, მან იცის, რომ ამ არჩევნებში არსებული მოდელის გარეშე ვერ გაიმარჯვებს, ამდენად ის შეეცდება მაქსიმალურად ხელი შეუშალოს საარჩევნო მოდელის ნებისმიერ გაუმჯობესებას“- განაცხადა ბაჩუკი ქარდავამ.