,,რუსეთს ვერავინ დაამარცხებს“ - მეჭიაური NATO-ს წინააღმდეგ

პოლიტიკა - 12:19, 09 May, 2016

3936

საპარლამენტო უმრავლესობის წევრი, თამაზ მეჭიაური საქართველოს ნატო-ში ინტეგრაციის საკითხს კიდევ ერთხელ ეხმაურება. მეჭიაური კვლავ აცხადებს, რომ ნატო-ს გაფართოება არ იგეგმება, შესაბამისად საქართველოს ინტეგრაციაც არ მოხდება. ამის შესახებ მეჭიაურმა ვაკის პარკში, უცნობი ჯარისკაცის მემორიალის შემკობის შემდეგ, ჟურნალისტებთან საუბრისას განაცხადა.

მეჭიაურის განცხადებით, იმისათვის, რომ საქართველომ ჩრდილოატლანტიკურ ალიანსში ინტეგრაცია შეძლოს, უარი უნდა თქვას აფხაზეთისა და ე.წ. სამხრეთ ოსეთის ოკუპირებული ტერიტორიების დაბრუნებაზე, წინააღმდეგ შემთხვევაში კონფლიქტი გარდაუვალია:

„ნატო-ში შესვლას ამ მოცემულობით მხარს არ ვუჭერ, იმიტომ, რომ დღევანდელი მოცემულობით არავინ არ მიგვიღებს ჩვენ ამ პრობლემებიანად თუ ჩვენ არ ვიტყვით უარს აფხაზეთისა და სახრეთ ოსეთის, ანუ სამაჩაბლოს დაბრუნებაზე. თვითონ ნატო-ში ამბობენ, რომ უახლოეს პერიოდში არ იგეგმება გაფართოება. თუ ვიცით, რომ არ მოხდება, რა გვინდა ჩვენ? თუ ნატო-სგან მოვითხოვთ დაგვიბრუნოს აფხაზეთი და სამხრეთ ოსეთი, ამით მან უნდა გადადგას ის ნაბიჯი, რომ ფაქტობრივად ომი გამოუცხადოს რუსეთს. რომელი ქვეყანაა ამისათვის მზად? მიმაჩნია, რომ ეს საფრთხის მატარებელია“, - განაცხადა მეჭიაურმა.

დეპუტატმა ასევე ისაუბრა სამხედრო შეიარაღებაზე და იარაღის შეძენაზე, მისი თქმით ნებისმიერ ქვეყანასთან, რომელიც საფრთხის უკუგდებაში დაეხმარება საქართველოს, იგი თანამშრომლობაზე უარს არ იტყვის. მეჭიაური ასევე აცხადებს, რომ „რუსეთის დამარცხება შეუძლებელია როგორც ამერიკული, ასევე რუსული იარაღითაც“:

„შეიარაღებას ამერიკაც მოგვცემს და რუსეთიც მოგვცემს. თანამშრომლობა ერთია და მხარედ ყოფნა მეორე. თუ ჩვენი ქვეყნისთვის სასარგებლო იქნება, საიდანაც საჭირო იქნება იქედან უნდა ვიყიდოთ იარაღი. რომელი ქვეყანაც გამოადგება ამ საქმეს, მე ნებისმიერთან ვითანამშრომლებ. რუსეთს დღეს ვერც ამერიკული იარაღით და ვერც რუსული იარაღით ვერ დაამარცხებ“, - განაცხადა თამაზ მეჭიაურმა.