ევროპაში უვიზო მიმოსვლასთან დაკავშირებით, საქართველოს საგარეო საქმეთა მინისტრის თქმით, ევროპის საბჭოსა და ევროპარლამენტში შესაბამისი პროცედურები მიმდინარეობს. ევროსაბჭოში მორიგი განხილვა 11 მაისს არის დაგეგმილი.

მიხეილ ჯანელიძის განცხადებით, საქართველო მასზე დაკისრებულ ყველა ვალდებულებას ასრულებს ვიზალიბერალიზაციისთვის.

„ვიზალიბერალიზაციასთან დაკავშირებით მიმდინარეობს ყველა პროცესი და პროცედურა როგორც პარლამენტში, ასევე საბჭოში, ევროპულ საბჭოში 11 მაისს დანიშნულია კიდევ ერთი განხილვა. ჩვენ ვხედავთ, რომ ნაბიჯები იდგმება იმისკენ, რომ საქართველომ რაც შეიძლება მალე მიიღოს ვიზალიბერალიზაცია“, - განაცხადა მიხეილ ჯანელიძემ.

საქართველოში სამუშაო ვიზიტით ევროსაბჭოს გენერალური მდივნის მოადგილე და ბულგარეთის საგარეო საქმეთა მინისტრი იმყოფებიან. ისინი ამ წუთებში საქართველოს საგარეო საქმეთა მინისტრთან მართავენ შეხვედრებს. ასევე შეხვდნენ საქართველოს პრეზიდენტს და პრემიერ-მინისტრსა და პარლამენტის თავმჯდომარესაც გაესაუბრებიან.

მიხეილ ჯანელიძესთან შეხვედრის შემდეგ, ერთობლივი პრესკონფერენციაც გაიმართება.